UCG FIFA15 kiberfutboli bo‘yicha O‘zbekiston Kubogi mintaqaviy saralash turniri Farg‘onada o‘tkazildi

UCG FIFA15 kiberfutboli bo‘yicha O‘zbekiston Kubogi mintaqaviy saralash turniri Farg‘onadagi Mundial klubida bo‘lib o‘tdi, unda Farg‘ona, Andijon va Qo‘qondan 24 nafar geymer ishtirok etdi, deb xabar beradi “Infocom.uz”.

Birinchi o‘rinni – Azizbek Ergashev, ikkinchi o‘rinni – Alisher Xashimov hamda uchinchi o‘rinni – Jamshid Jo‘rayev egalladi.

Musobaqa natijalari bo‘yicha Azizbek Ergashev va Alisher Xashimovlar Toshkent shahrida, 15—17-sentabr kunlari ICT EXPO2015 ko‘rgazmasi doirasida o‘tkaziladigan milliy finalda ishtirok etish uchun yo‘llanma oldi.

Bundan tashqari, kubok tashkilotchilari O‘zbekiston esporti bo‘yicha Farg‘ona mintaqaviy saralash turniri FIFA o‘yinida qatorasiga bir necha yillar mobaynida ishtirok etib, g‘olib bo‘lgan farg‘onalik taniqli efutbolchi Abror Rustamovga milliy finalda ishtirok etishi uchun maxsus kvota ajratdi.

Eslatib o‘tamiz, ICTWEEK 2015 Axborot-kommunikatsiya texnologiyalari haftaligi doirasida “Uzbekistan Cyber Games FIFA15 kiber futboli bo‘yicha O‘zbekiston Kubogi” esport musobaqalari o‘tkazilmoqda.

Tashkilotchi: InfoCOM.UZ jurnaliHamkor: “Alyans Arena” kompyuter klubiQo‘llab-quvvatlanishi: O‘zbekiston Respublikasi Axborot texnologiyalari va kommunikatsiyalarini rivojlantirish vazirligi.UCG FIFA15 turniri FIFA 15 o‘yini bo‘yicha Sony Play Station 4 o‘yin konsolida o‘tkaziladi.

Musobaqalarda ishtirok etish uchun 6 yoshdan boshlab barcha xohlovchilar (O‘zbekiston fuqarolari)ga ruxsat etiladi.

Turnir ikki bosqichda o‘tkaziladi:

1-sentabrdan 12-sentabrgacha – “Alyans Arena” klubida (Toshkent), Gamezone klubida (Samarqand), Mundial klubida (Farg‘ona) va Playstation Game klubida (Olmaliq) saralash musobaqalari o‘tkaziladi.

Urganch shahrida ham 6-sentabr kuni mintaqaviy saralash turniri ICE CREAM klubida o‘tkaziladi.

15—17-sentabr kunlari ICT EXPO2015 ko‘rgazmasida UCG FIFA15 Milliy finali o‘tkaziladi.

Turnirda 8 ta o‘rin g‘oliblariga sovrinlar (planshet, smartfon va mobil telefonlari taqdim etiladi) va diplom bilan taqdirlanadi.

Taqdirlash marosimi AKT Haftaligi natijalari bo‘yicha taqdirlash marosimida o‘tkaziladi.