Xitoy Kommunistik partiyasi Markaziy komiteti bosh matbuot organi — “Jenmin jibao” gazetasi tuzilmasiga kiruvchi “Jenminvan” internet-portalining korrupsiyada gumon qilingan top-menejerlari ishdan haydaldi. Bu haqda “TASS” xabar bermoqda.
Xabar berishlaricha, “Jenminvan” aksiyadorlik kompaniyasi prezidenti Lyao Xuna va direktor kengashi a’zosi, kompaniya vitse-prezidenti Chen Chjisya “egallab turgan lavozimidan bo‘shatilgan”. “Kompaniyaning yangi prezidenti etib Nyu Ibin tayinlandi”, — deyiladi “Sina” xabarida.
Xitoyning eng yirik OAVlaridan biridagi korrupsiya mojarosi o‘tgan hafta — 28-avgust kuni Xenan viloyati xalq prokuraturasi Lyao Xuna va Chen Chjisyaga nisbatan poraxo‘rlik gumoni bilan jinoyat ishi qo‘zg‘atib, dastlabki tergov harakatlarini o‘tkazganidan so‘ng boshlandi.
1997-yilda tashkil etilgan “Jenminvan” nafaqat Xitoy, balki jahondagi eng yirik internet-portallardan biri hisoblanadi. Kompaniya 2012-yili o‘z aksiyalarini Shanxay fond birjasiga birlamchi joylashtirish jarayoni (IPO)ni amalga oshirgan edi.
Izoh (0)