O‘zbekiston Davlat raqobat qo‘mitasida “Deloyt va Tush” (Deloitte & Touche) kompaniyasining Kaspiy mintaqasi auditorlik departamenti rahbari Endryu Uiks va Toshkentdagi “Deloyt” kompaniyasi direktori Erkin Ayupov bilan uchrashuv bo‘lib o‘tdi. Bu haqda UzDaily xabar bermoqda.
Mehmonlarga O‘zbekiston Prezidenti tomonidan 2015-yil 28-aprel kuni imzolangan “Iqtisodiyotda xususiy mulkning ulushi va ahamiyatini oshirish chora-tadbirlari to‘g‘risida”gi qaror bilan mamlakatda xususiylashtirish bo‘yicha yangi dastur qabul qilingani, u o‘z ko‘lami va yangi yondashuvlari bilan avvalgi dasturlardan farq qilishi haqida batafsil axborot berildi.
Xususan, mazkur qarorning 1-ilovasida yirik korxonalardagi davlat aksiyalar paketini xalqaro baholash tashkilotlarini jalb etgan holda strategik xorijiy investorlarga sotish ko‘zda tutilgan bo‘lib, bu holat investorlar uchun obyektlarning jozibadorligini oshirishga va baholash jarayonini shaffoflashtirishga ko‘mak beradi.
Mazkur dasturni keng tanitish maqsadida 2015-yil oktabr oyining ikkinchi o‘n kunligida Toshkent shahridagi Xalqaro investitsiya forumini o‘tkazish rejalashtirilmoqda.
Endryu Uiks bo‘lajak tadbirga qiziqish bildirdi va “Deloyt va Tush” kompaniyasi xususiylashtirish jarayoni, korporativ boshqaruv va boshqa sohalarda katta tajribaga ega ekanligini, faoliyat ko‘lami va nufuzi sezilarli kattaligi hamda mijozlar bazasi kengligini qayd etib o‘tdi. Bundan tashqari, kompaniya shu kabi tadbirlarni tashkil etish va ularda qatnashish tajbirasiga ham ega.
Uchrashuv yakunlari bo‘yicha har ikki tomon Toshkentdagi Xalqaro investitsiya forumini o‘tkazishda muntazam muloqotda bo‘lishga kelishib oldi.
Izoh (0)