Ўзбекистон Давлат рақобат қўмитасида «Делойт ва Туш» (Deloitte & Touche) компаниясининг Каспий минтақаси аудиторлик департаменти раҳбари Эндрю Уикс ва Тошкентдаги «Делойт» компанияси директори Эркин Аюпов билан учрашув бўлиб ўтди. Бу ҳақда UzDaily хабар бермоқда.
Меҳмонларга Ўзбекистон Президенти томонидан 2015 йил 28 апрель куни имзоланган «Иқтисодиётда хусусий мулкнинг улуши ва аҳамиятини ошириш чора-тадбирлари тўғрисида»ги қарор билан мамлакатда хусусийлаштириш бўйича янги дастур қабул қилингани, у ўз кўлами ва янги ёндашувлари билан аввалги дастурлардан фарқ қилиши ҳақида батафсил ахборот берилди.
Хусусан, мазкур қарорнинг 1-иловасида йирик корхоналардаги давлат акциялар пакетини халқаро баҳолаш ташкилотларини жалб этган ҳолда стратегик хорижий инвесторларга сотиш кўзда тутилган бўлиб, бу ҳолат инвесторлар учун объектларнинг жозибадорлигини оширишга ва баҳолаш жараёнини шаффофлаштиришга кўмак беради.
Мазкур дастурни кенг танитиш мақсадида 2015 йил октябрь ойининг иккинчи ўн кунлигида Тошкент шаҳридаги Халқаро инвестиция форумини ўтказиш режалаштирилмоқда.
Эндрю Уикс бўлажак тадбирга қизиқиш билдирди ва «Делойт ва Туш» компанияси хусусийлаштириш жараёни, корпоратив бошқарув ва бошқа соҳаларда катта тажрибага эга эканлигини, фаолият кўлами ва нуфузи сезиларли катталиги ҳамда мижозлар базаси кенглигини қайд этиб ўтди. Бундан ташқари, компания шу каби тадбирларни ташкил этиш ва уларда қатнашиш тажбирасига ҳам эга.
Учрашув якунлари бўйича ҳар икки томон Тошкентдаги Халқаро инвестиция форумини ўтказишда мунтазам мулоқотда бўлишга келишиб олди.
Изоҳ (0)