Axborot texnologiyalari va kommunikatsiyalarini rivojlantirish vazirligi tomonidan 21-avgust kuni Aloqa tarixi muzeyida O‘zbekiston Respublikasining Ochiq ma’lumotlar portali faoliyatini takomillashtirish, istiqbolda rivojlantirish yuzasidan 2015-yilning 7-avgustida Vazirlar Mahkamasi tomonidan “Ochiq ma’lumotlar taqdim etilishi hisobga olingan holda Internet tarmog‘ida O‘zbekiston Respublikasining Hukumat portalini yanada takomillashtirish chora-tadbirlari to‘g‘risida”gi 232-sonli qaroriga bag‘ishlangan matbuot anjumani tashkil etildi.
2015-yilning mart oyida sinov rejimida data.gov.uz manzilida ishga tushirilgan Ochiq ma’lumotlar portali O‘zbekiston Respublikasining “Davlat hokimiyati va boshqaruvi organlari faoliyatining ochiqligi to‘g‘risida”gi qonunida belgilab berilgan maqsad-vazifalarini amalga oshirish, amalda tatbiq etish maqsadida tashkil qilingan bo‘lib, O‘zbekistonda rivojlanib borayotgan “elektron hukumat” tizimining muhim tarkibiy qismlaridan biri hisoblanadi. Ochiq ma’lumotlar portali O‘zbekiston Respublikasining Hukumat portali (www.gov.uz) doirasida faoliyat ko‘rsatadi. Portal jismoniy va yuridik shaxslarga davlat organlari faoliyatiga oid ma’lumotlarni mashina o‘qiydigan shaklda erkin foydalanish uchun bepul taqdim qiladi.
2013—2020-yillarda O‘zbekiston Respublikasi Milliy axborot-kommunikatsiya tizimini rivojlantirish kompleks dasturi amalga oshirilishini muvofiqlashtirish respublika komissiyasi tomonidan davlat va xo‘jalik boshqaruvi organlari, mahalliy davlat hokimiyati organlarining rasmiy saytlarida va Ochiq ma’lumotlar portalida e’lon qilinishi lozim bo‘lgan ochiq ma’lumotlar to‘plamlari ro‘yxati tasdiqlanib, Hukumat portalida e’lon qilinadi.
Bugungi kungacha Ochiq ma’lumotlar portalida 50 ta davlat organlarining 550 turdagi ochiq ma’lumotlari e’lon qilingan va mazkur ma’lumotlar foydalanuvchilar tomonidan 100 ming marotabadan ziyod yuklab olingan. Jumladan, Xalq ta’limi vazirligi, Tashqi ishlar vazirligi, Davlat soliq qo‘mitasi, Davlat raqobat qo‘mitasi, Markaziy bank, Sog‘liqni saqlash vazirligi va boshqa davlat organlari tomonidan ochiq ma’lumotlar taqdim qilib kelinmoqda.
Aytish kerakki, davlat organlarining faoliyatiga oid ochiq ma’lumotlarning foydalanish uchun erkin va qulay bo‘lishi jamiyatdagi ijtimoiy munosabatlarning mustahkamlanishi, davlat va fuqarolar, davlat va tadbirkorlik subyektlari o‘rtasidagi aloqalarning yanada mustahkamlanishi, davlatning iqtisodiy rivoji, boshqaruvdagi samaradorligiga xizmat qiladi. Shu bilan birgalikda, ochiq ma’lumotlarning e’lon qilinishi fuqarolarning axborot olish va uni tarqatish, axborotdan foydalanish kabi muhim konstitutsiyaviy huquqlarining yanada keng ta’minlanishi, istiqbolda “elektron hukumat” tizimining muvaffaqiyatli tatbiq etilishiga poydevor bo‘lib xizmat qiladi.
Matbuot anjumanida mutaxassislar ommaviy axborot vositalari vakillarining mavzu yuzasidan savollariga javob berdi.
Izoh (0)