O‘zbekiston Davlat raqobat qo‘mitasida Ernst & Young kompaniyasining Toshkentdagi vakolatxonasi rahbari Anvar A’zamov bilan uchrashuv bo‘lib o‘tdi. Bu haqda UzDaily xabar bermoqda.
Qo‘mita raisi Davron Hidoyatov O‘zbekiston Prezidentining 2015-yil 28-apreldagi “Iqtisodiyotda xususiy mulkning ulushi va ahamiyatini oshirish chora-tadbirlari to‘g‘risida”gi qaroriga muvofiq amalga oshirilayotgan xususiylashtirish jarayonlari haqida mehmonlarga batafsil axborot berdi.
Uchrashuv chog‘ida tomonlar joriy yilning oktabr oyida o‘tkazilishi kutilayotgan Xalqaro investitsiya forumini tashkil etish bilan bog‘liq tashkiliy masalalarni muhokama qildi.
A’zamovning qayd etishicha, Ernst & Young kompaniyasi o‘z xodimlarini ma’ruzachi sifatida qatnashishini ta’minlash va korporatsiyaning xorijiy investor-hamkorlarini taklif etish yo‘li bilan Xalqaro investitsiya forumida ishtirok etishdan manfaatdor.
Uchrashuv yakunlari bo‘yicha tomonlar Xalqaro investitsiya forumini o‘tkazish bo‘yicha muntazam aloqada bo‘lishga kelishib oldi.
Izoh (0)