Xorazmda yashovchi erkak tanishining to‘yida spirtli ichimlik ichib, sarmast bo‘lib qolganidan keyin mahalladoshi bilan tortishib qoldi, deb yozadi “Huquq” gazetasi.
Mahalladoshi uning akasi ahmoq bo‘lganligi va narkotik iste’mol qilib, o‘lib ketganligini aytadi. Bu gaplar unga og‘ir botdi va mahalladoshini o‘ldirishga qaror qildi.
Nashr qayd etishicha, to‘ydan so‘ng ular birga uyga qaytishga qaror qildi. Yo‘l-yo‘lakay pivo sotib olib, uni taksida ichishdi. Ovloqroq joyda ular mashinadan tushib qoldi. Shundan keyin erkak pivo shishasini sindirib, mahalladoshiga tashlandi va bo‘yniga ketma-ket zarba berdi. Jabrlanuvchi shu yerning o‘zida jon berdi. Qotil esa marhumning egnidagi qimmatbaho charm kurtkasi va uyali telefonini olib, voqea joyidan qochib qoldi.
Uning qotilligi tezda fosh etildi. Jinoyat ishlari bo‘yicha Xorazm viloyat sudining hukmiga binoan qotil 16 yil muddatga ozodlikdan mahrum etildi.
Izoh (0)