Покистоннинг Музаффаргарҳ шаҳрида фаолияти тақиқланган «Лашкари Жҳангви» гуруҳи етакчиси, унинг икки ўғли ва 11 нафар жангари полиция томонидан йўқ қилинди. Бу ҳақда The Express Tribune нашри хабар бермоқда.
Ҳодиса аксилтеррор хизмати ходимлари Малик Исхоқ ва унинг ўғилларини яширин қурол-яроғ омборини аниқлаш мақсадида Музаффаргарҳга олиб келганидан сўнг юз берди. 29 июль куни тонгда қамоқхонага қайтиши вақтида полиция карвони Исхоқни озод этишга шайланган қуролланган мотоциклчилар ҳужумига учради. Отишма натижасида олти нафар полициячи яраланди.
Маҳаллий полиция расмий вакили Набила Ғазанфарнинг сўзларига кўра, ҳужумда 12—15 нафар жангари қатнашган. Ғазанфарнинг таъкидлашича, жангарилар Исхоқни қутқариб, мотоциклларда яширинишга уринган, бироқ полиция ходимлари уларни таъқиб этиб, бир неча нафарини отиб ўлдирган.
Исхоқ АҚШ томонидан қидирилаётган террорчилардан бири ҳисобланади. Унинг шиаларга қарши курашувчи «Лашкари Жҳангви» гуруҳи юзлаб тинч аҳоли вакилларининг ўлимига жавобгардир. Жангарилар етакчиси бир неча бор суд қилинган, бироқ ҳар сафар, гувоҳларнинг унга қарши кўрсатма беришдан бош тортиши сабаб, оқлаб келинган. Сўнгги бор у 25 июль куни, икки ўғли билан бирга ҳибсга олинганди.
Изоҳ (0)