Liviyada Muammar Qaddafiy tuzumi vakillari ustidan olib borilgan sud jarayoni davomida xalqaro adolatli sud tamoyillariga rioya etilmagan, shuningdek, ko‘plab qoidabuzarliklarga yo‘l qo‘yilgan. Bu haqda BMTning inson huquqlari bo‘yicha oliy komissari boshqarmasi vakili Ravina Shamdasani ma’lum qildi, deya xabar bermoqda “Vedomosti”.
28-iyul kuni Tripoli sudi polkovnik Muammar Qaddafiyning o‘g‘li Sayf al Islomni 2011-yilda amalga oshirilgan harbiy jinoyatlarda aybdor deb topdi va o‘lim jazosiga mahkum etdi. U bilan birga Liviya jamahiriyasi sobiq yetakchisi yaqinlaridan yana sakkiz kishi, xususan, razvedka xizmatining sobiq direktori Abdulla al-Sanussiy va parlamentning sobiq deputati Bag‘dodiy al-Mahmudiy ham o‘limga hukm qilingan.
“Biz hibsda saqlanish va sud jarayonlarini diqqat bilan kuzatib bordik va xalqaro adolatli sud tamoyillariga rioya etilmaganini aniqladik. Asosiy kamchilik sifatida sud aniq jinoyatlar uchun ayblanuvchilarning individual javobgarligini belgilay olmaganini ko‘rsatish mumkin. Shuningdek, gumonlanuvchilarning advokatlar xizmatidan foydalanishi borasida muammolar bo‘lgan, ularga yomon munosabatda bo‘lingani haqida ariza tushgan va ba’zi sud majlislari gumonlanuvchilarning ishtirokisiz o‘tkazilgan”, — deya qo‘shimcha qildi Shamdasani.
BMT IHOKB har qanday holatda ham o‘lim jazosini qo‘llashga qarshi chiqadi, dedi tashkilot vakili. Uning so‘zlariga ko‘ra, BMT IHOKB Liviya hukumatini adliya ishlarida inson huquqlarini poymol etmaslikka chaqiradi va Tripoli sudi hukmi ustidan shikoyat berilishi mumkinligiga umid qiladi.
BBC News xabariga ko‘ra, hozirgi vaqtda Liviyada Qaddafiy tuzumining o‘nlab tarafdorlari 2011-yilgi ommaviy namoyishlarni bostirishga aloqadorlikda gumon qilinib, sudlanmoqda. Sudlanuvchilar hukm ustidan apellyatsiya berishga haqli.
Izoh (0)