2015-yilning 22-iyul kuni O‘zbekiston Respublikasi mehnat va aholini ijtimoiy muhofaza qilish Vaziri A.Abduhakimov Yaponiyaning O‘zbekistondagi Favqulodda va Muxtor Elchisi Fumihiko Katoni qabul qildi. Bu haqda Vazirlik matbuot xizmati xabar bermoqda.
Uchrashuv davomida o‘zbekistonlik stajyorlarni Yaponiyada texnik tayyorlash dasturi bo‘yicha amaliy masalalar muhokama qilindi.
Yaponiya tomoni O‘zbekistondan ko‘proq ishchilarni o‘z tashkilotlariga jalb qilish uchun Yaponiya assotsiatsiyalari va tashkilotlari qo‘shimcha targ‘ibot va tashviqot ishlari olib borishi lozimligini qayd etdi. Ushbu tadbirlarni o‘tkazish O‘zbekistondan kunchiqar yurtga yo‘l oladigan stajyorlar sonini oshishiga xizmat qilishi ta’kidlandi. Shu maqsadda tomonlar hamkorlikda sayt ochishga kelishib oldi.
Bundan tashqari, tomonlar Qoraqalpog‘iston Respublikasi nogironlar uchun mintaqaviy reabilitatsiya markaziga Yaponiya granti asosida tibbiy uskuna va jihozlarni yetkazib berish masalasini muhokama qildi. Sentabrning ilk kunlarida Yaponiyadan keltirilgan, qiymati 249 ming dollardan ortiq tibbiy uskunalar bilan jihozlangan mazkur mintaqaviy reabilitatsiya markazidagi operatsiya blokining tantanali ochilish marosimi o‘tkazilishi belgilab olindi.
Izoh (0)