24-iyul, juma kuni Toshkentda uchuvchi-muhandis, kosmonavt, Rossiya, O‘zbekiston va Qirg‘iziston davlat mukofotlari sohibi, aviatsiya polkovnigi Solijon Shokirovich Sharipov bilan uchrashuv bo‘lib o‘tdi, deya xabar bermoqda “Gazeta.uz”. U BMT Taraqqiyot dasturi ko‘magida Café Scientifique loyihasi doirasida o‘tkazildi.
Anticafe O2’da yig‘ilganlarga Solijon Sharipov yetti kishilik oilada katta bo‘lgani, o‘zi ovqat pishirib, o‘t o‘rgani va sigir sog‘ganini aytib berdi. Uning kosmonavt bo‘lishiga katta orzu va O‘zgen shahri kutubxonasi yordam bergan. Bo‘lajak kosmonavt u yoki bu darajada aviatsiya, kosmonavtika va qiziqarli kishilar hayoti haqidagi barcha texnik adabiyotlarni o‘qib chiqqan.
Maktabda hech qanday muammolar bo‘lmagan, uyga berilgan vazifalarni u tanaffus vaqtida bajargan. Uyda esa dars qilishga vaqt bo‘lmagan, xo‘jalik ishlaridan qo‘li tegmagan, faqat kechalarigina tongga qadar kitob o‘qish mumkin bo‘lgan. Otasi sarflangan elektr energiyasi uchun uni koyigan.
Shuningdek, Solijon Sharipov uchrashuv ishtirokchilari savollariga javob berar ekan, “Soyuz” kosmik kemasi o‘z muqobillari ichida eng ishonchlisi ekanligini, uni uchirish esa Amerikaning kemalariga qaraganda qariyb 20 marta arzon tushishini ta’kidladi.
Kosmonavt raketada uchish chog‘ida paydo bo‘ladigan qo‘rquv, kosmosdagi hissiyotlar haqida ham so‘zlab berdi.
O‘z nutqini Solijon Sharipov Feruz Vohidovning quyidagi so‘zlari bilan yakunladi: “Har bir kishi o‘z ishida professor bo‘lishi kerak”. U yoshlarga o‘z maqsadlariga erishishda barcha imkoniyatlarini ishga solishni va smartfonlarni kamroq “kovlashtirish”ni tilab qoldi.
Izoh (0)