Buyuk Britaniyadagi mehmonxonada ruminiyalik ayolga uning millati bahona qilinib, xona kaliti berilmadi. Bu haqda The Daily Telegraph xabar bermoqda.
Gull universiteti aspiranturasida tahsil olayotgan 22 yoshli Aleksandra Puflea oqshomni yigiti bilan o‘tkazish maqsadida Holiday Inn Express mehmonxonasidan ikki kishilik xonani onlayn band qilgandi. Biroq yoshlar mehmonxonaga kelganidan so‘ng, ularga kalitni berishdan bosh tortilgan. “Juda ham afsusdamiz, biroq biz ruminlarni qabul qilmaymiz”, — dedi mehmonxona xodimi. Bu vaziyatda Puflea mehmonxona vakiliga ko‘rsatgan Britaniya haydovchilik guvohnomasi ham yordam bermadi.
Mehmonxona vakilining so‘zlariga ko‘ra, muassasada tashrifchilarga nisbatan qat’iy qoidalar amal qiladi, xususan, oxir-oqibat fohisha bo‘lib chiqishi mumkin bo‘lgan ruminiyalik ayollarni xonalarga joylashtirish mumkin emas. Puflea ruminiyalik ayollarning juda oz qismi fohishalik bilan shug‘ullanishini tushuntirishga uringan, biroq bu ham samara bermagan: menejerning so‘zlariga ko‘ra, avvalroq bu mamlakat ayollari mehmonxonaning doimiy mehmonlari bo‘lgan va shu sababli butun mehmonxona tarmog‘i obro‘siga jiddiy zarar yetgan.
Aleksandra Puflea mazkur milliy tahqirlash holatini tergov qilishni so‘rab politsiyaga murojaat qilgan. Mehmonxona ma’muriyati qizni mehmonxonaga kiritilmagani sabablarini izohlashdan bosh tortgan, biroq ruminlarga nisbatan o‘z siyosatini qayta ko‘rib chiqishga va’da bergan. O‘z navbatida, politsiya xodimlari fohisha deb gumon qilingan ayollar mehmonxonada paydo bo‘lganida, bu haqda zudlik bilan politsiyaga xabar berishni so‘ragan.
Hozirgi vaqtda Buyuk Britaniyada 100 mingdan ortiq rumin istiqomat qilmoqda, vaholanki, 2001-yilgi aholini ro‘yxatga olish natijalari mamlakatda 7,5 ming ruminiyalik yashashini ko‘rsatgan edi. Britaniya orollarida ruminlarning bu qadar ko‘payib ketishiga asosiy sabab 2007-yili Ruminiyaning Yevropa Ittifoqiga a’zo bo‘lganidir — shundan so‘ng ruminlar Buyuk Britaniyaga ommaviy ko‘chishni boshlagan.
Izoh (0)