Kogon shahrida 64 xonadondan iborat “Kamolot” uylari foydalanishga topshirildi

Buxoro viloyati Kogon shahrida 64 xonadonga mo‘ljallangan to‘rt qavatli “Kamolot” uyi foydalanishga topshirildi, deb xabar qiladi O‘zA.

Ushbu munosabat bilan o‘tkazilgan tadbirda viloyat va shahar hokimliklari mutasaddilari, jamoat tashkilotlari vakillari, yoshlar, ommaviy axborot vositalari xodimlari ishtirok etdi. Tadbirda Buxoro viloyati hokimi M.Esonov so‘zga chiqdi.

“Kamolot” uyi “Marsianin plyus” mas’uliyati cheklangan jamiyati quruvchilari tomonidan barpo etildi. Marosimda yosh oilalarga ikki va uch xonali uylarning kaliti topshirildi. Ular orasida mamlakat ijtimoiy-iqtisodiy hayotida fidokorona mehnati bilan tengdoshlariga namuna bo‘layotgan turli kasb egalari, O‘zbekiston sharafini xalqaro miqyosda ulug‘layotgan yosh sportchilar bor.

Kogon temiryo‘lchilar shahri sifatida ham e’tirof etiladi. Tabiiyki, “Kamolot” uyi kalitini olganlar orasida ham temiryo‘lchilar ko‘pchilikni tashkil etadi.

“Kamolot” uyi bunyod etilgan Ahillik ko‘chasida yil oxiriga qadar 32 xonadonga mo‘ljallangan yana bir ko‘p qavatli bino qurilishi rejalashtirilgan.