Бухоро вилояти Когон шаҳрида 64 хонадонга мўлжалланган тўрт қаватли «Камолот» уйи фойдаланишга топширилди, деб хабар қилади ЎзА.
Ушбу муносабат билан ўтказилган тадбирда вилоят ва шаҳар ҳокимликлари мутасаддилари, жамоат ташкилотлари вакиллари, ёшлар, оммавий ахборот воситалари ходимлари иштирок этди. Тадбирда Бухоро вилояти ҳокими М.Эсонов сўзга чиқди.
«Камолот» уйи «Марсианин плюс» масъулияти чекланган жамияти қурувчилари томонидан барпо этилди. Маросимда ёш оилаларга икки ва уч хонали уйларнинг калити топширилди. Улар орасида мамлакат ижтимоий-иқтисодий ҳаётида фидокорона меҳнати билан тенгдошларига намуна бўлаётган турли касб эгалари, Ўзбекистон шарафини халқаро миқёсда улуғлаётган ёш спортчилар бор.
Когон темирйўлчилар шаҳри сифатида ҳам эътироф этилади. Табиийки, «Камолот» уйи калитини олганлар орасида ҳам темирйўлчилар кўпчиликни ташкил этади.
«Камолот» уйи бунёд этилган Аҳиллик кўчасида йил охирига қадар 32 хонадонга мўлжалланган яна бир кўп қаватли бино қурилиши режалаштирилган.
Изоҳ (0)