“Kraudsorsing” uslubi shifokorlar kasalligi alomatlarini aniqlashga ojiz bo‘lgan bemorlarga to‘g‘ri tibbiy tashxis qo‘yishga yordam bermoqda. Bu haqda CrowdMed asoschilari Smitson instituti jurnaliga bergan intervyuda ma’lum qilgan.
CrowdMed — “tibbiyot detektivlari” diagnostika bilan shug‘ullanadigan sayt (ular orasida shifokorlar ham, ishqibozlar ham bor). Ularni to‘g‘ri tashhis qo‘yish va biroz mablag‘ ishlab olish istagi birlashtiradi. Sayt yaratuvchilarining aytishicha, ikki yil davomida CrowdMed mingga yaqin tibbiy hodisalarda chindan ham yordam bergan.
Uning ishlash tartibi shunday: mijoz 50 dollar to‘lab, saytda ro‘yxatdan o‘tadi. Profilida savollarga javob berib, o‘zini bezovta qilayotgan alomatlarni ta’riflaydi. Shundan so‘ng egasining ismi-sharifi yashirilgan kasallik tarixi ochiq muhokamaga qo‘yiladi va foydalanuvchilar mavjud ma’lumotlar asosida tashxis qo‘yadi. Tashxisi to‘g‘ri chiqqan “detektiv”lar mukofot jamg‘armasini o‘zaro bo‘lishib oladi. Loyiha mualliflari saytda kasallik faqat aniqlanishi, uni davolash uchun esa haqiqiy shifokorga uchrash lozimligi to‘g‘risida ogohlantiradi.
Izoh (0)