Qirg‘izistonning O‘sh shahrida 3-iyul kuni Shayx Muhammad Sodiq Muhammad Yusuf nomidagi kutubxonaning ochilishi bo‘lib o‘tdi. Bu haqda “12news.uz” xabar bermoqda.
Tadbirda shahar qoziligi, Bishkek universiteti vakillari va turli millatga mansub mahalliy yoshlar ishtirok etdi.
Hozirgi vaqtda kutubxonada diniy adabiyotlar to‘plangan, bundan tashqari bu yerda turli o‘quv qo‘llanmalari, bolalar adabiyotlari, yuridik kitoblar, rus, o‘zbek, qirg‘iz mumtoz adabiyoti asarlarini topish mumkin.
Kutubxona xodimlarining so‘zlariga ko‘ra, hozirgi vaqtda muassasa fondining 70—80 foizi shayxning kitoblaridan tashkil topgan. Kelajakda esa ularning sonini yanada oshirish ko‘zda tutilgan
“Kelajakda biz shayxning barcha kitoblarini to‘playmiz. Biroq faqat uning emas, balki boshqa olimlarning asarlarini ham to‘plashni maqsad qilganmiz. Mashhur olimlarning kitoblarini, ilmiy, badiiy, qirg‘iz adabiyotini olib kelish niyatidamiz. Kutubxona madaniyat markaziga aylanadi. Bu haqiqiy bilim bulog‘i bo‘ladi”, - dedi kutubxona tashkilotchisi Azamat Nosirov.
Qayd etish joiz, kutubxona fondini boyitish maqsadida shayx kitoblari O‘zbekistondan olib kelinadi.
Eslatib o‘tamiz, Shayx Muhammad Sodiq Muhammad Yusuf 2015-yilning 10-mart kuni vafot etgan edi. O‘tgan vaqt davomida Janubiy Koreya va Qozog‘istonda shayx nomi bilan ataluvchi ikkita yangi masjid ochilishi bo‘lib o‘tdi.
Izoh (0)