Қирғизистоннинг Ўш шаҳрида 3 июль куни Шайх Муҳаммад Содиқ Муҳаммад Юсуф номидаги кутубхонанинг очилиши бўлиб ўтди. Бу ҳақда «12news.uz» хабар бермоқда.
Тадбирда шаҳар қозилиги, Бишкек университети вакиллари ва турли миллатга мансуб маҳаллий ёшлар иштирок этди.
Ҳозирги вақтда кутубхонада диний адабиётлар тўпланган, бундан ташқари бу ерда турли ўқув қўлланмалари, болалар адабиётлари, юридик китоблар, рус, ўзбек, қирғиз мумтоз адабиёти асарларини топиш мумкин.
Кутубхона ходимларининг сўзларига кўра, ҳозирги вақтда муассаса фондининг 70—80 фоизи шайхнинг китобларидан ташкил топган. Келажакда эса уларнинг сонини янада ошириш кўзда тутилган
«Келажакда биз шайхнинг барча китобларини тўплаймиз. Бироқ фақат унинг эмас, балки бошқа олимларнинг асарларини ҳам тўплашни мақсад қилганмиз. Машҳур олимларнинг китобларини, илмий, бадиий, қирғиз адабиётини олиб келиш ниятидамиз. Кутубхона маданият марказига айланади. Бу ҳақиқий билим булоғи бўлади», - деди кутубхона ташкилотчиси Азамат Носиров.
Қайд этиш жоиз, кутубхона фондини бойитиш мақсадида шайх китоблари Ўзбекистондан олиб келинади.
Эслатиб ўтамиз, Шайх Муҳаммад Содиқ Муҳаммад Юсуф 2015 йилнинг 10 март куни вафот этган эди. Ўтган вақт давомида Жанубий Корея ва Қозоғистонда шайх номи билан аталувчи иккита янги масжид очилиши бўлиб ўтди.
Изоҳ (0)