Yevropa Ittifoqining xorijiy ishlar kengashi 22-iyun kuni Yevroittifoqning Markaziy Osiyo bo‘yicha strategiyasining amalga oshirilishiga doir xulosalarni qabul qildi. “Gazeta.uz”ning xabar berishicha, mazkur muhim hujjatda Yevropa Ittifoqining mintaqadagi besh mamlakat bilan munosabatlaridagi asosiy yo‘nalishlar belgilab qo‘yilgan.
Strategiya qabul qilingan 2007-yildan beri kengash har ikki yilda uning amalga oshirilishini ko‘rib chiqadi va hamkorlikning asosiy yo‘nalishlarini yangilab turadi. Kengash mintaqa mamlakatlari va boshqa aloqador davlat hamda tashkilotlar bilan keng muhokama qilib, so‘ng qabul qiladigan xulosalar Yevropa Ittifoqining Markaizy Osiyo bo‘yicha strategiyasining yangi yo‘nalishlarini ko‘rsatib beradi.
Xulosalarda har bir mamlakat va umuman mintaqa bilan ikki tomonlama aloqalar sezilarli rivojlangani qayd etilib, Yevropa Ittifoqi va Markaziy Osiyo mamlakatlari o‘rtasidagi siyosiy va iqtisodiy hamkorlikni yanada kengaytirishdan har ikki tomon kuchli manfaatdor ekanligi ta’kidlangan.
Mintaqa mamlakatlari o‘rtasidagi ijtimoiy-iqtisodiy darajalarning farqi va Yevropa bilan hamkorlik qilishga intilish o‘sib borayotgani munosabati bilan, Yevropa Ittifoqi aniq natijalar va o‘zgarishlarga erishish uchun ba’zi sohalarda mintaqaviy va ikki tomonlama tashabbuslar muvozanatini qayta ko‘rib chiqish kerakligini tan oladi.
Mintaqaviy tashabbuslar bundan keyin ham qo‘llab-quvvatlanadi, biroq mamlakatlarning ehtiyojlaridan kelib chiqqan holda tayyorlanadi. Bundan ko‘zlangan maqsad Yevropa Ittifoqi dasturlari va tashabbuslarining ijobiy ta’sirini kuchaytirish, shuningdek, ularning samaradorligini oshirishdan iborat.
Xulosalarda strategiyaning asosiy maqsad va yo‘nalishlari dolzarbligi tasdiqlanib, Markaziy Osiyo va Yevropa Ittifoqi mamlakatlari orasida savdo va energetika sohasidagi munosabatlarni yanada kengaytirish maqsadida Markaziy Osiyoning investitsiyaviy jozibadorligini oshirishda Yevropa Ittifoqining rolini mustahkamlashga chaqirilgan.
Ayni vaqtda, hujjatda Yevropa Ittifoqi xavfsizlik sohasida mintaqa mamlakatlari bilan muloqotni kuchaytirish va inson huquqlari sohasidagi jiddiy chaqiruvlarni muhokama qilish bo‘yicha Yevropa Ittifoqi tashabbuslarini mustahkamlash ishiga sodiq ekanligi qayd etiladi.
Ma’lumot uchun, Yevropa Ittifoqining Markaziy Osiyo mamlakatlari bilan ikki tomonlama va mintaqaviy hamkorligi uchun yo‘naltirilgan mablag‘ miqdori 2014-2020-yillarda 50 foizga (2007-2013-yillardagi dastur bilan taqqoslaganda), 1,068 milliard yevrogacha oshirildi.
Xulosalarda ko‘rsatilishicha, Yevropa Ittifoqi loyihalari, muloqotlari, platformalarini amalga oshirish, shuningdek, ularga baho berish va targ‘ib qilish ishiga jalb etilgan va mintaqada faol bo‘lgan Yevropa Ittifoqi subyektlari, xususan, Yevropa Ittifoqiga a’zo alohida davlatlar o‘rtasidagi munosabatlar va muvofiqlashgan harakatlarni yanada yaxshilash zarur.
Izoh (0)