Европа Иттифоқининг хорижий ишлар кенгаши 22 июнь куни Евроиттифоқнинг Марказий Осиё бўйича стратегиясининг амалга оширилишига доир хулосаларни қабул қилди. «Газета.uz»нинг хабар беришича, мазкур муҳим ҳужжатда Европа Иттифоқининг минтақадаги беш мамлакат билан муносабатларидаги асосий йўналишлар белгилаб қўйилган.
Стратегия қабул қилинган 2007 йилдан бери кенгаш ҳар икки йилда унинг амалга оширилишини кўриб чиқади ва ҳамкорликнинг асосий йўналишларини янгилаб туради. Кенгаш минтақа мамлакатлари ва бошқа алоқадор давлат ҳамда ташкилотлар билан кенг муҳокама қилиб, сўнг қабул қиладиган хулосалар Европа Иттифоқининг Маркаизй Осиё бўйича стратегиясининг янги йўналишларини кўрсатиб беради.
Хулосаларда ҳар бир мамлакат ва умуман минтақа билан икки томонлама алоқалар сезиларли ривожлангани қайд этилиб, Европа Иттифоқи ва Марказий Осиё мамлакатлари ўртасидаги сиёсий ва иқтисодий ҳамкорликни янада кенгайтиришдан ҳар икки томон кучли манфаатдор эканлиги таъкидланган.
Минтақа мамлакатлари ўртасидаги ижтимоий-иқтисодий даражаларнинг фарқи ва Европа билан ҳамкорлик қилишга интилиш ўсиб бораётгани муносабати билан, Европа Иттифоқи аниқ натижалар ва ўзгаришларга эришиш учун баъзи соҳаларда минтақавий ва икки томонлама ташаббуслар мувозанатини қайта кўриб чиқиш кераклигини тан олади.
Минтақавий ташаббуслар бундан кейин ҳам қўллаб-қувватланади, бироқ мамлакатларнинг эҳтиёжларидан келиб чиққан ҳолда тайёрланади. Бундан кўзланган мақсад Европа Иттифоқи дастурлари ва ташаббусларининг ижобий таъсирини кучайтириш, шунингдек, уларнинг самарадорлигини оширишдан иборат.
Хулосаларда стратегиянинг асосий мақсад ва йўналишлари долзарблиги тасдиқланиб, Марказий Осиё ва Европа Иттифоқи мамлакатлари орасида савдо ва энергетика соҳасидаги муносабатларни янада кенгайтириш мақсадида Марказий Осиёнинг инвестициявий жозибадорлигини оширишда Европа Иттифоқининг ролини мустаҳкамлашга чақирилган.
Айни вақтда, ҳужжатда Европа Иттифоқи хавфсизлик соҳасида минтақа мамлакатлари билан мулоқотни кучайтириш ва инсон ҳуқуқлари соҳасидаги жиддий чақирувларни муҳокама қилиш бўйича Европа Иттифоқи ташаббусларини мустаҳкамлаш ишига содиқ эканлиги қайд этилади.
Маълумот учун, Европа Иттифоқининг Марказий Осиё мамлакатлари билан икки томонлама ва минтақавий ҳамкорлиги учун йўналтирилган маблағ миқдори 2014-2020 йилларда 50 фоизга (2007-2013 йиллардаги дастур билан таққослаганда), 1,068 миллиард еврогача оширилди.
Хулосаларда кўрсатилишича, Европа Иттифоқи лойиҳалари, мулоқотлари, платформаларини амалга ошириш, шунингдек, уларга баҳо бериш ва тарғиб қилиш ишига жалб этилган ва минтақада фаол бўлган Европа Иттифоқи субъектлари, хусусан, Европа Иттифоқига аъзо алоҳида давлатлар ўртасидаги муносабатлар ва мувофиқлашган ҳаракатларни янада яхшилаш зарур.
Изоҳ (0)