“Toshshahartransxizmat” aksiyadorlik kompaniyasi so‘nggi vaqtlarda tez-tez yong‘in chiqqan avtobuslarning keyingi taqdiri haqida ma’lum qildi. Bu haqda “Oila davrasida” gazetasiga tayanib, “Uz24.uz” xabar qilmoqda.
Kompaniyaning Yo‘lovchi transport korxonalarini modernizatsiyalash va texnik qayta jihozlash bo‘limi boshlig‘i M. Aliyevning so‘zlariga ko‘ra, yong‘in asosan avtobuslarning motor bo‘linmasida yuz berayotgani inobatga olinib, ular ta’mirlanib qayta yo‘nalishga chiqarilmoqda. Avtobuslar butunlay tasarrufdan chiqarilmaydi.
Avtobus ishga chiqishdan oldin navbatchi mexanik ertalab ishga chiqish vaqtida texnik va sanitar ko‘rikdan o‘tkazadi. Kechki payt ham avtobuslar yo‘nalishdan qaytganda xuddi shu tadbir amalga oshiriladi. Agar biror nosozlik aniqlansa, avtobus ta’mirlash ustaxonasiga qaytariladi.
Avtobuslarga o‘rnatilgan tartibda 15 ming, 30 ming, 45 ming va 90 ming kilometr masofada belgilangan ish hajmlari reja bo‘yicha servis xizmati ko‘rsatiladi, ulardagi barcha nosozlik chuqur tekshiruvdan o‘tkazilib, belgilangan tartibda qayd etiladi.
Avvalroq Mercedes-Benz rusumli avtobuslarning yonib ketishiga asosan elektr simlarining qisqa tutashuvi sabab bo‘layotgani xabar qilingandi.
Kompaniya ma’muriyati boshqa rusumdagi jamoat transportlarini xarid qilishni rejalashtirmagan. Yong‘inlarning oldini olish uchun barcha choralar ko‘rilayotgani bois boshqa rusumli avtobuslar olish ko‘zda tutilmagan.
Izoh (0)