«Тошшаҳартрансхизмат» акциядорлик компанияси сўнгги вақтларда тез-тез ёнғин чиққан автобусларнинг кейинги тақдири ҳақида маълум қилди. Бу ҳақда «Оила даврасида» газетасига таяниб, «Uz24.uz» хабар қилмоқда.
Компаниянинг Йўловчи транспорт корхоналарини модернизациялаш ва техник қайта жиҳозлаш бўлими бошлиғи М. Алиевнинг сўзларига кўра, ёнғин асосан автобусларнинг мотор бўлинмасида юз бераётгани инобатга олиниб, улар таъмирланиб қайта йўналишга чиқарилмоқда. Автобуслар бутунлай тасарруфдан чиқарилмайди.
Автобус ишга чиқишдан олдин навбатчи механик эрталаб ишга чиқиш вақтида техник ва санитар кўрикдан ўтказади. Кечки пайт ҳам автобуслар йўналишдан қайтганда худди шу тадбир амалга оширилади. Агар бирор носозлик аниқланса, автобус таъмирлаш устахонасига қайтарилади.
Автобусларга ўрнатилган тартибда 15 минг, 30 минг, 45 минг ва 90 минг километр масофада белгиланган иш ҳажмлари режа бўйича сервис хизмати кўрсатилади, улардаги барча носозлик чуқур текширувдан ўтказилиб, белгиланган тартибда қайд этилади.
Аввалроқ Mercedes-Benz русумли автобусларнинг ёниб кетишига асосан электр симларининг қисқа туташуви сабаб бўлаётгани хабар қилинганди.
Компания маъмурияти бошқа русумдаги жамоат транспортларини харид қилишни режалаштирмаган. Ёнғинларнинг олдини олиш учун барча чоралар кўрилаётгани боис бошқа русумли автобуслар олиш кўзда тутилмаган.
Изоҳ (0)