Rossiyadagi “Yejednevniy jurnal” nashri bosh muharriri Aleksandr Riklin muxolifatchi Boris Nemsovning o‘ldirilishi bilan bog‘liq tergov ishi bo‘yicha so‘roq vaqtida marhum siyosatchi va Chechenistonning amaldagi rahbari Ramzon Qodirov o‘rtasidagi nizo haqida ma’lumot berdi. Bu haqda Meduza xabar bermoqda.
Nemsovlar oilasining advokati Vadim Proxorovning ma’lum qilishicha, Riklin 2002-yili Gubermesda yuz bergan nizo haqida so‘zlab bergan. “O‘shanda Nemsov eson-omon chiqib ketishi uchun Ahmad Qodirov unga maxsus qo‘riqchilarni biriktirishga majbur bo‘lgandi”, — dedi Proxorov.
“TASS”ning so‘roqdan so‘ng bevosita Riklinga asoslanib xabar berishicha, jurnalist 2002-yil qishida bo‘lgan voqea haqida ma’lumot bergan – o‘shanda Nemsov chechen xalqi qurultoyida ishtirok etib, “nisbatan keskin fikr bildirgandi”.
“Mazkur yig‘ilishdan so‘ng Nemsov nomiga tahdidlar bo‘lgandi, xususan, bevosita Qodirovning o‘zi ham Nemsovga tahdid qilgandi”, - dedi bosh muharrir.
Ramzon Qodirov bilan 2002-yili yuz bergan kelishmovchilik haqida Boris Nemsovning o‘zi ham memuarlarida yozgandi. Unda, jumladan, shunday deyiladi: “Zaldan chiqqanimdan keyin oldimga ko‘zlari oqimtir bir odam kelib, bunday nutq uchun meni o‘ldirish kerakligini aytdi. Men: “Siz kimsiz?”, deb so‘radim. U yo Federal xavfsizlik xizmati podpolkovnigi, yo polkovnigiga tegishli guvohnomani chiqarib, menga ko‘rsatdi. Bu Ramzon Qodirov edi”.
Eslatib o‘tamiz, rossiyalik muxolifatchi Boris Nemsov 27-fevral kuni Moskva markazida o‘ldirib ketilgandi. Qotillikda gumon qilinib besh nafar chechenistonlik hibsga olingan.
Izoh (0)