Россиядаги «Ежедневний журнал» нашри бош муҳаррири Александр Риклин мухолифатчи Борис Немцовнинг ўлдирилиши билан боғлиқ тергов иши бўйича сўроқ вақтида марҳум сиёсатчи ва Чеченистоннинг амалдаги раҳбари Рамзон Қодиров ўртасидаги низо ҳақида маълумот берди. Бу ҳақда Meduza хабар бермоқда.
Немцовлар оиласининг адвокати Вадим Прохоровнинг маълум қилишича, Риклин 2002 йили Губермесда юз берган низо ҳақида сўзлаб берган. «Ўшанда Немцов эсон-омон чиқиб кетиши учун Аҳмад Қодиров унга махсус қўриқчиларни бириктиришга мажбур бўлганди», — деди Прохоров.
«ТАСС»нинг сўроқдан сўнг бевосита Риклинга асосланиб хабар беришича, журналист 2002 йил қишида бўлган воқеа ҳақида маълумот берган – ўшанда Немцов чечен халқи қурултойида иштирок этиб, «нисбатан кескин фикр билдирганди».
«Мазкур йиғилишдан сўнг Немцов номига таҳдидлар бўлганди, хусусан, бевосита Қодировнинг ўзи ҳам Немцовга таҳдид қилганди», - деди бош муҳаррир.
Рамзон Қодиров билан 2002 йили юз берган келишмовчилик ҳақида Борис Немцовнинг ўзи ҳам мемуарларида ёзганди. Унда, жумладан, шундай дейилади: «Залдан чиққанимдан кейин олдимга кўзлари оқимтир бир одам келиб, бундай нутқ учун мени ўлдириш кераклигини айтди. Мен: «Сиз кимсиз?», деб сўрадим. У ё Федерал хавфсизлик хизмати подполковниги, ё полковнигига тегишли гувоҳномани чиқариб, менга кўрсатди. Бу Рамзон Қодиров эди».
Эслатиб ўтамиз, россиялик мухолифатчи Борис Немцов 27 февраль куни Москва марказида ўлдириб кетилганди. Қотилликда гумон қилиниб беш нафар чеченистонлик ҳибсга олинган.
Изоҳ (0)