O‘zbekistonda litsenziyasiz yuk va yo‘lovchi tashiyotgan 79 nafar avtotransport haydovchilariga 65 mln so‘m jarima solindi

O‘zbekiston Respublikasi Prezidentining 2006-yil 9-martdagi “Avtomobil transportida yo‘lovchilar tashish sohasidagi tadbirkorlik faoliyatining alohida turlarini amalga oshirishni tartibga solish to‘g‘risida”gi PQ-303-sonli qarori va O‘zbekiston Respublikasi Vazirlar Mahkamasining 2011-yil 18-maydagi “Yo‘nalishsiz taksilar faoliyatini tartibga solish chora tadbirlari to‘g‘risida”gi 139-sonli qarorlari ijrosini ta’minlash maqsadida muntazam ravishdagi nazorat tadbirlarini amalga oshirish bo‘yicha chora-tadbirlar rejasi ishlab chiqildi, deb xabar beradi O‘zbekiston avtomobil va daryo transporti agentligi matbuot xizmati.

Ushbu reja jadvalga va viloyat hokimining 2015-yil 2-maydagi chora-tadbirlar rejasiga asosan Andijon viloyatning barcha hududlarida qo‘shma reyd tadbirlari amalga oshirilmoqda.

Qo‘shma reyd davomida Andijon shahrida yo‘lovchi tashish faoliyati bilan shug‘ullanayotgan yengil avtomobillar haydovchilariga yo‘l haqini asossiz ravishda oshirmaslik borasida tashviqot-targ‘ibot ishlari olib borildi.

Andijonda o‘tkazilgan tadbirlar davomida jami 36 ta avtotrasport egalari litsenziyasiz noqonuniy faoliyat ko‘rsatayotganligi va 125 ta haydovchilarning turli qoidabuzarliklari aniqlandi.

Shuningdek, Agentlikning Xorazm viloyat bo‘limida ham Viloyat Ichki ishlar boshqarmasi, Yo‘l harakati xavfsizligi boshqarmasi va Viloyat davlat soliq boshqarmasi xodimlari bilan hamkorlikda qo‘shma reyd tadbirlari bo‘lib o‘tdi. Qo‘shma reyd tadbirlari davomida avtotransport haydovchilari tomonidan 251 ta turli qonunbuzarliklarga yo‘l qo‘yilganligi aniqlandi.

Jumladan yuk avtotransport vositalari haydovchilari tomonidan 18 ta hamda yo‘lovchi tashish bilan shug‘ullanayotgan avtotransportlardan esa 233 ta qoidabuzarlik holatlari aniqlandi.

Litsenziyasiz noqonuniy ravishda yuk va yo‘lovchi tashiyotgan 79 nafar avtotransport haydovchilari aniqlanib, ularga nisbatan hamkorlikda ma’muriy bayonnomalar tuzildi. To‘plangan hujjatlar sud organlariga, Davlat soliq inspeksiyasi xodimlari tomonidan yuborildi. Sud organlari ularga nisbatan 65 million 475 ming so‘m miqdorida jarima qo‘lladi.

Litsenziyasiz noqonuniy faoliyat ko‘rsatayotgan haydovchilarga viloyat IIB YHXB xamda DSI xodimlari tomonidan belgilangan tartibda dalolatnomalar rasmiylashtirilib avtomobillari vaqtincha jarima maydoniga kiritildi.

Bu boradagi qo‘shma reyd tadbirlari davom etmoqda.