2015-yil 1-iyuldan boshlab telekommunikatsiyaning universal xizmatlari uchun yangi tariflar amalga kiritiladi, deya xabar bermoqda “Gazeta.uz” “O‘zbektelekom” kompaniyasiga tayanib.
Shaharda uy telefonidan foydalanish uchun oylik abonent to‘lovi vaqtbay to‘lov tizimi bo‘yicha 1700 so‘mdan 2040 so‘mga (qishloq joylarda 715 so‘mdan 900 so‘mga), abonent to‘lov tizimi bo‘yicha 2239 so‘mdan 2690 so‘mga (qishloq joylarda 1060 so‘mdan 1325 so‘mga) qimmatlashadi.
Bir oyda belgilangan 180 daqiqa limitdan ortiqcha amalga oshirilgan so‘zlashuv uchun, abonent to‘lovidan tashqari, har bir to‘liq yoki noto‘liq daqiqa uchun to‘lanadigan vaqtbay to‘lov miqdori 9 so‘m etib belgilandi.
Mahalliy telefon tarmog‘ining vaqtbay to‘lov tizimida mahalliy so‘zlashuvlar uchun soat 22:00 – 07:00 oralig‘ida 0,10 foiz miqdoridagi kamaytirish koeffitsiyenti miqdori avvalgidek saqlanib qoladi.
Shoshilinch chaqiruv xizmatlari bilan so‘zlashuvlar uchun vaqtbay to‘lov xizmati olinmaydi.
Sobiq Sovet ittifoqining qator davlatlari bilan xalqaro telefon aloqalari xizmati tarifi ham oshiriladi. Jumladan Markaziy Osiyo mamlakatlari (Qozog‘iston, Qirg‘iziston, Tojikiston va Turkmaniston) bilan to‘liq va to‘liq bo‘lmagan har bir daqiqa to‘lovi 400 so‘mdan 500 so‘mga, Kavkaz (Ozarbayjon, Armaniston va Gruziya) bilan esa 500 so‘mdan 625 so‘mgacha, Rossiya, Ukraina, Belarus va Moldova bilan 440 so‘mdan 550 so‘mgacha oshiriladi.
Mamlakat ichida telegramma jo‘natish tariflari 1-iyuldan oddiy telegrammada bir so‘z narxi uchun 37 so‘m, shoshilinch telegrammada har bir so‘z 184 so‘m etib belgilandi. Barcha turdagi telegrammalar uchun telegraf yig‘imlari 153 so‘mdan 184 so‘mgacha oshirildi.
Izoh (0)