Ўзбекистонда лицензиясиз юк ва йўловчи ташиётган 79 нафар автотранспорт ҳайдовчиларига 65 млн сўм жарима солинди

Ўзбекистон Республикаси Президентининг 2006 йил 9 мартдаги «Автомобиль транспортида йўловчилар ташиш соҳасидаги тадбиркорлик фаолиятининг алоҳида турларини амалга оширишни тартибга солиш тўғрисида»ги ПҚ-303-сонли қарори ва Ўзбекистон Республикаси Вазирлар Маҳкамасининг 2011 йил 18 майдаги «Йўналишсиз таксилар фаолиятини тартибга солиш чора-тадбирлари тўғрисида»ги 139-сонли қарорлари ижросини таъминлаш мақсадида мунтазам равишдаги назорат тадбирларини амалга ошириш бўйича чора-тадбирлар режаси ишлаб чиқилди, деб хабар беради Ўзбекистон автомобиль ва дарё транспорти агентлиги матбуот хизмати.

Ушбу режа жадвалга ва вилоят ҳокимининг 2015 йил 2 майдаги чора-тадбирлар режасига асосан Андижон вилоятнинг барча ҳудудларида қўшма рейд тадбирлари амалга оширилмоқда.

Қўшма рейд давомида Андижон шаҳрида йўловчи ташиш фаолияти билан шуғулланаётган енгил автомобиллар ҳайдовчиларига йўл ҳақини асоссиз равишда оширмаслик борасида ташвиқот-тарғибот ишлари олиб борилди.

Андижонда ўтказилган тадбирлар давомида жами 36 та автотраспорт эгалари лицензиясиз ноқонуний фаолият кўрсатаётганлиги ва 125 та ҳайдовчиларнинг турли қоидабузарликлари аниқланди.

Шунингдек, Агентликнинг Хоразм вилоят бўлимида ҳам Вилоят Ички ишлар бошқармаси, Йўл ҳаракати хавфсизлиги бошқармаси ва Вилоят давлат солиқ бошқармаси ходимлари билан ҳамкорликда қўшма рейд тадбирлари бўлиб ўтди. Қўшма рейд тадбирлари давомида автотранспорт ҳайдовчилари томонидан 251 та турли қонунбузарликларга йўл қўйилганлиги аниқланди.

Жумладан юк автотранспорт воситалари ҳайдовчилари томонидан 18 та ҳамда йўловчи ташиш билан шуғулланаётган автотранспортлардан эса 233 та қоидабузарлик ҳолатлари аниқланди.

Лицензиясиз ноқонуний равишда юк ва йўловчи ташиётган 79 нафар автотранспорт ҳайдовчилари аниқланиб, уларга нисбатан ҳамкорликда маъмурий баённомалар тузилди. Тўпланган ҳужжатлар суд органларига, Давлат солиқ инспекцияси ходимлари томонидан юборилди. Суд органлари уларга нисбатан 65 миллион 475 минг сўм миқдорида жарима қўллади.

Лицензиясиз ноқонуний фаолият кўрсатаётган ҳайдовчиларга вилоят ИИБ ЙҲХБ хамда ДСИ ходимлари томонидан белгиланган тартибда далолатномалар расмийлаштирилиб автомобиллари вақтинча жарима майдонига киритилди.

Бу борадаги қўшма рейд тадбирлари давом этмоқда.