Namangan viloyati kichik va o‘rta biznes sohasida faoliyat olib borayotgan 60dan ortiq ayol 16-iyun kuni Chust shahrida ochilgan “Biznesdagi ayollar” trening seriyasida ishtirok etmoqda. Bu haqda “Gazeta.uz” xabar bermoqda.
Treninglar Buyuk Britaniyaning O‘zbekistondagi elchixonasi tomonidan O‘zbekiston Xotin-qizlar qo‘mitasi bilan hamkorlikda tashkil etilgan bo‘lib, tadbirni Rio Tinto, ITE Uzbekistan, Denton’s, Carlsberg Uzbekistan va GlaxoSmithKline kompaniyalari qo‘llab-quvvatladi – aynan ularning vakillari trener sifatida ishtirok etmoqda.
“Buyuk Britaniya elchixonasi ketma-ket ikkinchi yil mazkur tadbirni uyushtirmoqda. Biz bu yerga tajribalarimiz bilan o‘rtoqlashish va trening ishtirokchilari o‘zlari tanlagan tadbirkorlik sohasida muvaffaqiyat qozonishlariga yordam berish maqsadida yig‘ilganmiz”, - dedi elchi o‘rinbosari Fiona Makston. Ochilish marosimida Namangan viloyati Xotin-qizlar qo‘mitasi raisi Nasiba Bozorova ham qatnashdi.
Tadbir floristika va zamonaviy libos dizayni bo‘yicha treninglarni o‘z ichiga olgan, unda Toshkentning mashhur gul do‘konlari va atelyelari vakillari o‘z tajribalarini baham ko‘radi. Biznesni tashkil etish va boshqarish masalalariga bag‘ishlangan ikki kunlik mahorat mashg‘ulotlari davomida ishtirokchilar qanday qilib biznesni boshlash va samarali rahbar bo‘lish, qiyinchiliklarni yengib o‘tish, mahsulot va xizmatlarni targ‘ib qilish, mijozlar bilan ishlash va ish bo‘yicha muzokaralar olib borish ko‘nikmalarini o‘rganadi.
Treninglar yakuni bo‘yicha “Ishbilarmon ayol: biznesda muvaffaqiyatga erishish” mavzusida davra suhbati bo‘lib o‘tadi. Unda Britaniya kompaniyalarida va Britaniya Kengashining O‘zbekistondagi vakolatxonasida rahbarlik lavozimlarini egallab turgan ayollar chiqish qiladi. Ular karyerani qurish bo‘yicha o‘z shaxsiy tajribalari bilan o‘rtoqlashib, ishbilarmon ayolga zarur ko‘nikmalarni rivojlantirish haqida maslahatlar beradi.
Izoh (0)