Наманган вилояти кичик ва ўрта бизнес соҳасида фаолият олиб бораётган 60дан ортиқ аёл 16 июнь куни Чуст шаҳрида очилган «Бизнесдаги аёллар» тренинг сериясида иштирок этмоқда. Бу ҳақда «Газета.uz» хабар бермоқда.
Тренинглар Буюк Британиянинг Ўзбекистондаги элчихонаси томонидан Ўзбекистон Хотин-қизлар қўмитаси билан ҳамкорликда ташкил этилган бўлиб, тадбирни Rio Tinto, ITE Uzbekistan, Denton’s, Carlsberg Uzbekistan ва GlaxoSmithKline компаниялари қўллаб-қувватлади – айнан уларнинг вакиллари тренер сифатида иштирок этмоқда.
«Буюк Британия элчихонаси кетма-кет иккинчи йил мазкур тадбирни уюштирмоқда. Биз бу ерга тажрибаларимиз билан ўртоқлашиш ва тренинг иштирокчилари ўзлари танлаган тадбиркорлик соҳасида муваффақият қозонишларига ёрдам бериш мақсадида йиғилганмиз», - деди элчи ўринбосари Фиона Макстон. Очилиш маросимида Наманган вилояти Хотин-қизлар қўмитаси раиси Насиба Бозорова ҳам қатнашди.
Тадбир флористика ва замонавий либос дизайни бўйича тренингларни ўз ичига олган, унда Тошкентнинг машҳур гул дўконлари ва ателелари вакиллари ўз тажрибаларини баҳам кўради. Бизнесни ташкил этиш ва бошқариш масалаларига бағишланган икки кунлик маҳорат машғулотлари давомида иштирокчилар қандай қилиб бизнесни бошлаш ва самарали раҳбар бўлиш, қийинчиликларни енгиб ўтиш, маҳсулот ва хизматларни тарғиб қилиш, мижозлар билан ишлаш ва иш бўйича музокаралар олиб бориш кўникмаларини ўрганади.
Тренинглар якуни бўйича «Ишбилармон аёл: бизнесда муваффақиятга эришиш» мавзусида давра суҳбати бўлиб ўтади. Унда Британия компанияларида ва Британия Кенгашининг Ўзбекистондаги ваколатхонасида раҳбарлик лавозимларини эгаллаб турган аёллар чиқиш қилади. Улар карьерани қуриш бўйича ўз шахсий тажрибалари билан ўртоқлашиб, ишбилармон аёлга зарур кўникмаларни ривожлантириш ҳақида маслаҳатлар беради.
Изоҳ (0)