2015 йил 1 июлдан бошлаб телекоммуникациянинг универсал хизматлари учун янги тарифлар амалга киритилади, дея хабар бермоқда «Газетa.uz» «Ўзбектелеком» компаниясига таяниб.
Шаҳарда уй телефонидан фойдаланиш учун ойлик абонент тўлови вақтбай тўлов тизими бўйича 1700 сўмдан 2040 сўмга (қишлоқ жойларда 715 сўмдан 900 сўмга), абонент тўлов тизими бўйича 2239 сўмдан 2690 сўмга (қишлоқ жойларда 1060 сўмдан 1325 сўмга) қимматлашади.
Бир ойда белгиланган 180 дақиқа лимитдан ортиқча амалга оширилган сўзлашув учун, абонент тўловидан ташқари, ҳар бир тўлиқ ёки нотўлиқ дақиқа учун тўланадиган вақтбай тўлов миқдори 9 сўм этиб белгиланди.
Маҳаллий телефон тармоғининг вақтбай тўлов тизимида маҳаллий сўзлашувлар учун соат 22:00 – 07:00 оралиғида 0,10 фоиз миқдоридаги камайтириш коэффициенти миқдори аввалгидек сақланиб қолади.
Шошилинч чақирув хизматлари билан сўзлашувлар учун вақтбай тўлов хизмати олинмайди.
Собиқ Совет иттифоқининг қатор давлатлари билан халқаро телефон алоқалари хизмати тарифи ҳам оширилади. Жумладан Марказий Осиё мамлакатлари (Қозоғистон, Қирғизистон, Тожикистон ва Туркманистон) билан тўлиқ ва тўлиқ бўлмаган ҳар бир дақиқа тўлови 400 сўмдан 500 сўмга, Кавказ (Озарбайжон, Арманистон ва Грузия) билан эса 500 сўмдан 625 сўмгача, Россия, Украина, Беларусь ва Молдова билан 440 сўмдан 550 сўмгача оширилади.
Мамлакат ичида телеграмма жўнатиш тарифлари 1 июлдан оддий телеграммада бир сўз нархи учун 37 сўм, шошилинч телеграммада ҳар бир сўз 184 сўм этиб белгиланди. Барча турдаги телеграммалар учун телеграф йиғимлари 153 сўмдан 184 сўмгача оширилди.
Изоҳ (0)