Rossiyadagi Soccer.ru internet nashri o‘tgan mavsumda Rossiya chempionatining eng yaxshi futbolchisini aniqlash uchun nomzodlarni muxlislar e’tiboriga havola qildi. O‘tgan mavsumning eng yaxshi futbolchisi bo‘lishga “Krasnodar” yarim himoyachisi, o‘zbekistonlik Odil Ahmedov ham da’vogarlik qilmoqda, deb xabar beradi “Uff.uz”.
“Odil Ahmedov ‘Krasnodar’da ‘Anji’da bo‘lganidek yorqin o‘yin namoyish qila olmayapti. Ammo yarim himoyachi krasnodarliklar tarkibida ham foydali ish qilish borasida aslo ortda qolgani yo‘q.
Aynan Odilning sharofati bilan ‘Krasnodar’ning hujumkor futbolchilari bemalol raqib darvozasi oldida o‘ynashlari mumkin. Chunki tayanch nuqtasida Ahmedov ishonchli o‘yin namoyish qilayotgan bo‘ladi.
Odilsiz ‘Krasnodar’ bu qadar shiddatli o‘ynay olmagan bo‘lardi. Chunki ba’zan uning yolg‘iz o‘zi maydon markazini ushlab turishi mumkin”, — deyiladi Soccer.ru tomonidan keltirilgan maqolada.
Eslatib o‘tamiz, Ahmedov “Krasnodar”ning 2014/15-mavsumidagi eng yaxshi futbolchisi deb topilgandi.
Izoh (0)