Polshaning Vrotslav shahrida og‘ir atletika bo‘yicha yoshlar o‘rtasida jahon chempionati bahslari qizg‘in davom etmoqda, deb xabar beradi O‘zbekiston Milliy olimpiya qo‘mitasi matbuot xizmati.
Dunyoning 42 davlati vakillari ishtirokida o‘tayotgan mazkur jahon birinchiligida O‘zbekiston sharafini uch nafar sportchi himoya qilmoqda.
Ushbu jahon chempionatida o‘zbekistonliklar orasida birinchi bo‘lib bahslarga kirishgan Adhamjon Ergashev (-62 kg) dast ko‘tarishda 124 kg, siltab ko‘tarishda 151 kg, ikki kurash yakunlariga ko‘ra 275 kg toshni o‘ziga bo‘ysundirib, bir yo‘la uchta kumush medalga sazovor bo‘ldi.
9-iyun kuni vazni 77 kilogrammgacha bo‘lgan sportchilar o‘rtasida musobaqalar o‘tkazilib, unda ishtirok etgan o‘zbekistonlik Fayzulla Nabiyev dast ko‘tarishda 145 kg, siltab ko‘tarishda esa 170 kg natijani qayd etib, ikkikurash yakuniga ko‘ra 315 kg ko‘rsatkich bilan kuchli oltilikdan o‘rin egalladi.
13-iyun kuni jahon chempionatida yuqori vaznli (+105 kg) polvonlar bahslarga kirishadi. Shu kuni yana bir o‘zbek sportchisi Davron Kenjayev medallar uchun kurash olib boradi.
Izoh (0)