Pak Kin Xe: janubiy koreyaliklar koronavirus tufayli sarosimaga tushmasligi kerak

Koreya Respublikasi prezidenti Pak Kin Xe mamlakat fuqarolarini Yaqin Sharq respirator sindromi (MERS) koronavirusi tarqalishi tufayli sarosimaga tushmaslikka chaqirdi. Bu haqda u Seulda vazirlar mahkamasi bilan uchrashuvda aytib o‘tdi, deb yozadi “TASS”.

“Odamlarning xavotirga tushib qolganini tushunish mumkin, biroq ular sarosimaga berilmaydi va hukumat bilan hamjihatlikda ish tutadi, degan umiddaman. Aks holda esa bu mamlakat iqtisodiyotini izdan chiqarishi mumkin”, — dedi davlat rahbari.

So‘nggi paytlarda ko‘pchilik koreyaliklar kasallanib qolishdan qo‘rqib, do‘kon aylanish va boshqa jamoatchilik joylariga borishdan voz kecha boshladi. Bu esa chakana savdo, turizm va iqtisodiy faoliyatning boshqa qator sohalariga ta’sir o‘tkaza boshladi.

Pak Kin Xe tegishli vazirlarga “epidemiyaning respublika iqtisodiyotiga salbiy ta’sirini kamaytirish uchun barcha choralarni ko‘rish”ni buyurdi.