Braziliyalik erkakning miyasi operatsiya qilinayotganida, u gitarada Beatles guruhi qo‘shig‘ini ijro etib turdi. Vesti.ru’ning xabar berishicha, jarrohlik amaliyoti vaqtida bankda ishlovchi 33 yoshli Entoni Dias xushini yo‘qotmagan.
Beatles’ning mashhur “Yesterday”idan tashqari, u bir necha Braziliya xalq qo‘shiqlari va yangi tug‘ilgan o‘g‘li uchun o‘zi bastalagan kuylarni ham ijro etdi.
“Shifokorlar mendan xalq qo‘shiqlaridan birini qayta ijro etishni so‘rashdi, shunday ekan, men talablarga binoan sozandalik qildim”, - deya hazillashdi braziliyalik erkak, miyadagi o‘simtani olib tashlash bo‘yicha operatsiyadan so‘ng.
Telegraph’ning yozishicha, Dias gitarada 20 yildan beri kuy chalib keladi. Uning miyasidagi o‘simta o‘g‘li tug‘ilganidan 15 kun o‘tib topilgandi. Tan olishicha, u shu sabab bilan duduqlanishni boshlagan va o‘z mashinasining markasini ham aytolmay qolgan. Biroq operatsiya muvaffaqiyatli o‘tdi. Braziliyalikning “konserti” esa videoga yozib olindi.
https://youtu.be/zgs6viZaMOM
Miyada bu kabi operatsiyalarni o‘tkazish – keng tarqalgan amaliyotlardan biri. 2014-yil sentyabrida isroillik shifokorlar tomonidan tremordan aziyat chekayotgan va ko‘p yillardan beri sahnaga chiqolmayotgan skripkachi ayol operatsiya qilingandi. Operatsiya vaqtida ayol xushida bo‘lgan va skripka chalib yotgan.
Bunday operatsiyalar vaqtida bemor xushini yo‘qotmasligi kerak, chunki shifokorlar uning reaksiyasini kuzatib boradi. Mazkur holat shifokorlarga miyaning nutq va harakat uchun javobgar muhim markazlariga kutilmaganda jarohat yetkazish oldini olishga yordam beradi.
Izoh (0)