Бразилиялик эркакнинг мияси операция қилинаётганида, у гитарада Beatles гуруҳи қўшиғини ижро этиб турди. «Вести.ru»нинг хабар беришича, жарроҳлик амалиёти вақтида банкда ишловчи 33 ёшли Энтони Диас хушини йўқотмаган.
Beatles’нинг машҳур «Yesterday»идан ташқари, у бир неча Бразилия халқ қўшиқлари ва янги туғилган ўғли учун ўзи басталаган куйларни ҳам ижро этди.
«Шифокорлар мендан халқ қўшиқларидан бирини қайта ижро этишни сўрашди, шундай экан, мен талабларга биноан созандалик қилдим», - дея ҳазиллашди бразилиялик эркак, миядаги ўсимтани олиб ташлаш бўйича операциядан сўнг.
Telegraph’нинг ёзишича, Диас гитарада 20 йилдан бери куй чалиб келади. Унинг миясидаги ўсимта ўғли туғилганидан 15 кун ўтиб топилганди. Тан олишича, у шу сабаб билан дудуқланишни бошлаган ва ўз машинасининг маркасини ҳам айтолмай қолган. Бироқ операция муваффақиятли ўтди. Бразилияликнинг «концерти» эса видеога ёзиб олинди.
https://youtu.be/zgs6viZaMOM
Мияда бу каби операцияларни ўтказиш – кенг тарқалган амалиётлардан бири. 2014 йил сентябрида исроиллик шифокорлар томонидан тремордан азият чекаётган ва кўп йиллардан бери саҳнага чиқолмаётган скрипкачи аёл операция қилинганди. Операция вақтида аёл хушида бўлган ва скрипка чалиб ётган.
Бундай операциялар вақтида бемор хушини йўқотмаслиги керак, чунки шифокорлар унинг реакциясини кузатиб боради. Мазкур ҳолат шифокорларга миянинг нутқ ва ҳаракат учун жавобгар муҳим марказларига кутилмаганда жароҳат етказиш олдини олишга ёрдам беради.
Изоҳ (0)