Жанубий Корея соғлиқни сақлаш ва фаровонлик вазирлиги Яқин Шарқ респиратор синдроми коронавируси – MERS билан зарарланган учинчи одам ҳалок бўлганини тасдиқлади. Бу ҳақда «РИА Новости» хабар бермоқда.
Аввалроқ, душанба куни ушбу вирус натижасида икки киши ҳалок бўлгани ҳақида хабар берилган эди.
Баёнотда қайд этилишича, астма ва бактериал пневмониядан азият чеккан 82 ёшли Жанубий Корея фуқароси коронавирус билан зарарланган беморлар билан бирга бир палатада даволанаётган бўлган. У пайшанбага ўтар кечаси вафот этган.
Ҳозирги вақтгача Жанубий Кореяда MERS’ни юқтириб олиш билан боғлиқ 36та ҳолат қайд этилди, улардан уч нафари вафот этди. Карантинда бўлиши керак бўлган фуқаролар сони эса 1,3 минг нафарга кўпайган. Касаллик олдини олиш мақсадида мамлакат бўйлаб 900дан ортиқ мактаб ва боғчалар ёпилди.
Чоршанба куни Жанубий Корея ҳукумати коронавирусга қарши кураш бўйича тезкор гуруҳ ташкил этилганини эълон қилди. Шунингдек, MERS билан касалланган беморлар юбориладиган бир қатор касалхоналар белгилаб олиниши кутилмоқда. Жанубий Корея аҳолисининг талабига қарамай, ҳукумат ҳозирча MERS билан зарарланган беморлар жойлаштирилган касалхоналар номини эълон қилмаяпти.
Изоҳ (0)