Latviya Seymi (parlamenti) birinchi urinishda mamlakat prezidentini saylay olmadi. Bu haqda “RIA Novosti” xabar bermoqda.
Oliy davlat lavozimiga to‘rt nomzod: hukumat koalitsiyasidan ikki kishi – mudofaa vaziri Raymond Veyonis (“Yashillar va dehqonlar ittifoqi) va huquqshunos Egils Levits (“Hamma – Latviyaniki”) va muxolifat partiyalaridan yana ikki kishi – Martinsh Bondars (“Mintaqaviy alyans”) va Sergey Dolgopolov (“Hamjihatlik”) da’vogarlik qildi.
Saylovda Veyonis va Levits favorit deb hisoblanayotgandi. Amaldagi prezident Andris Berzinsh esa shaxsiy sabablarga ko‘ra ikkinchi muddatga saylanmaslikka qaror qildi. Saylov natijalariga ko‘ra, Veyonisni 34, Levitsni 24, Dolgopolovni 23 va Bondarsni olti deputat qo‘llab-quvvatladi.
Barcha nomzodlar ishtirokidagi saylovning ikkinchi raundi yaqin soatlarda bo‘lib o‘tadi. Shundan so‘ng eng kam ovoz olgan nomzodlar hisobdan chiqarib boriladi.
Latviya parlamentar respublika hisoblanadi. Konstitutsiyaga muvofiq, prezidentni Seym saylaydi. Saylovda g‘alaba qozonish uchun nomzod 100 deputatdan kamida 51 nafarining ovozini qo‘lga kiritishi kerak. Latviya prezidenti to‘rt yillik muddatga saylanadi.
Latviya mustaqilligi tiklangan 1991-yildan beri respublikaga to‘rtta prezident – Guntis Ulmanis, Vayra Vike-Freyberga, Valdis Zatlers va Andris Berzinsh rahbarlik qilgan.
Izoh (0)