Misrda bundan 45-36 million yil avval yashagan va uzunligi 18 metrga teng bo‘lgan qadimgi kit suyaklari topildi. “TASS”ning Misr atrof-muhitni muhofaza qilish vazirligiga asoslanib xabar berishicha, skeletlar al-Fayum viloyatidagi Kitlar vodiysi (Vadi al-Xitan)dagi paleontologiya qazishmalari vaqtida topilgan.
O‘z vaqtida sayyoraning barcha iliq dengizlarida yashagan bu kit zamonasining eng katta yirtqichlaridan biri deb hisoblanadi. Tana tuzilishi hozirgi kitlarnikidan farqli bo‘lgan bazilozavr deb ataladigan bu mavjudotning o‘ziga xosligi – rudimentar orqa oyoqlarining borligidir.
Bu bir vaqtlar katta dengizning tubi bo‘lgan Vadi al-Xitanda topilgan ilk kit qoldiqlari emas. Bungacha bu yerda besh turdagi kitlar, uch turdagi dengiz sigirlari, ikki timsoh, bir necha toshbaqa, dengiz ilonlari va ko‘plab baliq turlari qoldiqlari topilgan.
Bu yerda topilgan bazilozavr suyaklari juda yaxshi saqlangan bo‘lib, orqa oyoqlarining suyaklarini ham o‘z ichiga olgan. Olimlarning fikricha, qadimgi kit sudralib yuruvchiga o‘xshab ketgani sabab, qadimgi fir’avnlar davrida topilgan kit suyaklari timsoh-xudoga e’tiqod qilish madaniyatiga sabab bo‘lgan bo‘lishi mumkin.
Kitlar vodiysidagi dengiz mavjudotlarining ilk qoldiqlari 1902-yilda topilgan, biroq oradan faqat yuz yil o‘tib – 2005-yilda bu joy YuNЕSKO o‘z muhofazasiga olgan ochiq osmon ostidagi qo‘riqxonaga aylantirilgan.
Izoh (0)