Латвия Сейми биринчи уринишда мамлакат президентини сайлай олмади

Латвия Сейми (парламенти) биринчи уринишда мамлакат президентини сайлай олмади. Бу ҳақда «РИА Новости» хабар бермоқда.

Олий давлат лавозимига тўрт номзод: ҳукумат коалициясидан икки киши – мудофаа вазири Раймонд Вейонис («Яшиллар ва деҳқонлар иттифоқи») ва ҳуқуқшунос Эгилс Левитс («Ҳамма – Латвияники») ва мухолифат партияларидан яна икки киши – Мартинш Бондарс («Минтақавий альянс») ва Сергей Долгополов («Ҳамжиҳатлик») даъвогарлик қилди.

Сайловда Вейонис ва Левитс фаворит деб ҳисобланаётганди. Амалдаги президент Андрис Берзиньш эса шахсий сабабларга кўра иккинчи муддатга сайланмасликка қарор қилди. Сайлов натижаларига кўра, Веёнисни 34, Левицни 24, Долгополовни 23 ва Бондарсни олти депутат қўллаб-қувватлади.

Барча номзодлар иштирокидаги сайловнинг иккинчи раунди яқин соатларда бўлиб ўтади. Шундан сўнг энг кам овоз олган номзодлар ҳисобдан чиқариб борилади.

Латвия парламентар республика ҳисобланади. Конституцияга мувофиқ, президентни Сейм сайлайди. Сайловда ғалаба қозониш учун номзод 100 депутатдан камида 51 нафарининг овозини қўлга киритиши керак. Латвия президенти тўрт йиллик муддатга сайланади.

Латвия мустақиллиги тикланган 1991 йилдан бери республикага тўртта президент – Гунтис Улманис, Вайра Вике-Фрейберга, Валдис Затлерс ва Андрис Берзиньш раҳбарлик қилган.