Yangi internet-virus routerlar orqali ijtimoiy tarmoqlardagi akkauntlarni egallamoqda

Yangi internet-virus jahon bo‘ylab milliondan ortiq xonadon routerlarini zararladi. Informing.ru’ning ESET kompaniyasi mutaxassislariga asoslanib xabar berishicha, ko‘plab foydalanuvchilar ularning routeri zararlanganini bilmaydi ham.

Elan (fransuzcha “bug‘u” degani) nomini olgan virus ommabop ijtimoiy tarmoqlarga sizib kirish uchun kuchsiz parollarning oddiy tanlovidan foydalanadi. Shundan so‘ng zararlangan routerning egasi YouTube, Twitter, Instagram va Facebook’dagi hisoblariga kirmoqchi bo‘lganida, buning uddasidan chiqolmaydi.

Mutaxassislarning so‘zlariga ko‘ra, o‘g‘irlangan hisoblardan ijtimoiy tarmoqlardagi layklar va reklama postlarini qayta e’lon qilish savdosida foydalaniladi. Shunindek, bu akkauntlardan yanada xavfliroq viruslarga yo‘naltiradigan “fishing” havolalarni tarqatish bilan shug‘ullanish mumkin.

Hozircha mazkur virusga eng chidamsiz routerlar sifatida Actiontec, Hik Vision, Netgear, Synology, TP-Link, ZyXEL va Zhone kompaniyalari mahsulotlari ko‘rsatilmoqda. Mutaxassislarning ta’kidlashicha, jamoat joylaridagi Wi-Fi’ga ulanish nuqtalari va hatto ba’zi tibbiy jihozlar ham ushbu virus hujumiga uchrashi mumkin.