Rossiyaning Penza viloyatida yashovchi Suxovlar oilasi Chevroletning mahalliy dileri va GM korporatsiyasining Sankt-Peterburgdagi zavodi ustidan 50 million rubllik da’vo ochdi, deya xabar bermoqda “Izvestiya”. Ularning fikricha, zavod yaroqsiz Chevrolet Cruze’ni chiqargan.
Gap shundaki, 2014-yil 9-oktabrda harakatlanish chog‘ida mashinaning old o‘ng g‘ildiragidagi uzatma yorilib ketgan. Biroq 2013-yilda Amerika konsernining o‘zi ushbu detal nuqsonli bo‘lishi mumkinligi haqida ogohlantirgan, butun dunyo bo‘ylab 180 mingga yaqin avtomobil qaytarib olingan (ya’ni ulardagi nuqson bepul bartaraf etilgan) edi.
Servis aksiyasi Rossiyaga ham tegishli bo‘lgan, biroq Suxovlar oilasi ularni hech kim bu haqda xabardor qilmagani va dilerlik markaziga chaqirmaganini aytmoqda.
Huquqshunoslar fikricha, Suxovlar ma’naviy zararni qoplash uchun bunday katta mablag‘ni undira olmaydi, ularga bir necha ming rubl berilishi mumkin xolos — to‘g‘ridan-to‘g‘ri zarar qoplab bo‘lingan: diler mashinani tuzatib bergan.
Izoh (0)