GM Uzbekistan xodimlari Chevrolet Orlando avtomobili va yangi Chevrolet Tracker modelini Rally Muynak loyihasi doirasida sinab ko‘radi, deya xabar bermoqda “Gazeta.uz”.
“O‘zavtosanoat” kompaniyasi saytida aytilishicha, O‘zbekistonda mamlakat shaharlari bo‘ylab dastlabki avtosayohat — Rally Muynak loyihasi boshlandi. Mazkur loyihaning asosiy maqsadi — O‘zbekistonda avtosayohatni ommalashtirish.
“Qadimiy shaharlar Samarqand, Buxoro, Xiva, Nurotadagi Iskandar Zulqarnaynning “Nur” qal’asi xarobalari, Chashma masjid majmuasi, Qizilqum sahrosi, Haydarko‘l suv havzasi kabi ko‘plab qiziqarli so‘lim va xushmanzara joylar hafta davomida avtopoyga ishtirokchilarini qarshi oladi. Bundan tashqari avtosayohatchilar yo‘l-yo‘lakay qoyalarga o‘yib ishlangan tasvirlar, Ayoz-qal’a xarobalari bilan tanishgach, Amudaryo orqali o‘tib, aksariyat sayyohlarning orzusiga aylangan Mo‘ynoq shahridagi Orol fojiasi haqida hikoya qiluvchi sahrodagi kemalar va o‘lkashunoslik muzeyini ham ko‘zdan kechirish imkoniga ega bo‘ladi”, — deyiladi xabarda.
Dastlabki loyihada to‘qqiz kishi to‘rtta avtomobilda ishtirok etmoqda. “O‘zavtosanoat” AK vakillari ham avtopoygada ishtirok etmoqda. GM Uzbekistan AJ ishchilari boshqa ishtirokchilar bilan bir qatorda, O‘zbekistonning xushmanzara joylariga tashrif buyurish bilan birga, Chevrolet Orlando va yangi Chevrolet Tracker rusumidagi avtomobillarni sinovdan o‘tkazadi.
“Yaqinda zavodimiz yangi Chevrolet Tracker rusumidagi avtomobiliga ega bo‘ldi. Mazkur avtopoygada esa ushbu yangi avtomobilni sinovdan o‘tkazishni rejalashtirganmiz. Bizning vazifamiz, barchaga tanish Chevrolet Orlando va yangi Chevrolet Tracker avtomobillari yurtimiz iqlimiga qanchalik mos kelishi va noqulay yo‘l sharoitida qanday harakatlanishi haqida avtohavaskorlar va haydovchilar tomonidan beriladigan savollarga xolis javob berish. Bizning vazifamiz — avtosayohat davomida yuqori haroratda, qum va chang yo‘llarda avtomobilning uzoq masofaga qanday harakatlanishini kuzatish. Yonilg‘i sarfiga e’tibor qaratamiz va sayohatni yakunlagach, yakuniy hisobot tayyorlaymiz. Shunday qilsak, yangi avtomobilni o‘zimizning bozorga ixtisoslashtirishimiz mumkin bo‘ladi”, — dedi GM Uzbekistan AJ sport bo‘limi rahbari, menejer Sherzod Jumayev.
Izoh (0)