Ўзбекистон Республикаси Соғлиқни сақлаш вазирлиги, Кардиологлар уюшмаси, Республика ихтисослаштирилган кардиология маркази ҳамкорлигида Ўзбекистон кардиологларининг VII съезди ташкил этилди, деб хабар қилади ЎзА.
Унда Жанубий Корея, Ҳиндистон, Германия, Швейцария, Россия, Венгрия, Польша, Чехия ва бошқа мамлакатлардан юзга яқин олимлар, шифокорлар, ёш тадқиқотчилар, халқаро ташкилотлар вакиллари иштирок этди.
Жаҳон соғлиқни сақлаш ташкилотининг маълумотига кўра, дунёда ҳар минг чақалоқнинг 6—7 нафарида туғма юрак нуқсони қайд этилади. Бу хасталикни операция йўли билан бутунлай бартараф этиш ва беморни тўлақонли ҳаётга қайтариш мумкин. Ўзбекистонда бундай хасталик аниқланган бемор болаларни соғломлаштириш давлат бюджети ва хайрия ташкилотлари маблағлари ҳисобидан амалга оширилмоқда.
Республика ихтисослаштирилган кардиология маркази мутахассисларининг сўзларига кўра, артериал босимни назорат қилиш миокард инфарктини 40—50 фоизга, мия инсультини 60 фоизга камайтириш имконини беради. Ўзбекистонда сўнгги беш йил ичида ўткир миокард инфарктидан келиб чиқадиган ўлим кўрсаткичини 9—10 фоизга камайтиришга эришилди.
Илгарилари болаларга кардиожарроҳлик соҳасида тиббий ёрдам кўрсатиш ишлари улар уч ёшга тўлганидан кейин бошланарди. Кардиожарроҳлик мажмуасида чақалоқларга ҳам мазкур йўналишда тиббий ёрдам кўрсатилмоқда. Бу хасталикларни эрта босқичларда бартараф этиш имконини бермоқда.
Ўзбекистонда соғлиқни сақлаш соҳасида амалга оширилаётган кенг кўламли ислоҳотлар, кардиологик хизматнинг бугунги аҳволи ва истиқболлари, юрак-қон томир касалликларининг олдини олиш, уларни жарроҳлик йўли билан даволаш, инновацион технологиялар ва уларнинг амалиётга татбиқ этилишига оид маърузалар тингланди, фикр алмашилди.
Изоҳ (0)