Vazirlar Mahkamasi O‘zbekistonda milliy kinematografiya sohasini isloh qilish va yanada rivojlantirishga qaratilgan chora-tadbirlar rejasi tasdiqladi. Bu haqda “O‘zbekkino” Milliy agentligi matbuot xizmati xabar bermoqda.
Shuningdek, 2015-yil mobaynida “2016-2020-yillarda “O‘zbekkino” Milliy agentligi va uning tizimidagi korxona-tashkilotlar faoliyatini yanada takomillashtirish, samaradorligini oshirish hamda ishlab chiqarishni modernizatsiya qilish, texnik va texnologik qayta jihozlash” Davlat dasturi loyihasini ishlab chiqish rejalashtirilgan.
Sohada faoliyat ko‘rsatayotgan ijodkorlarni qo‘llab-quvvatlash va ularning kasb mahoratini oshirish maqsadida iste’dodli yosh kinoijodkorlarni rivojlangan xorijiy mamlakatlardagi ta’lim muassasalari, ilg‘or kinostudiyalarga o‘qishga, malaka oshirish va tajriba almashishga yuborish, xorijiy mamlakatlarning kinematografiya sohasidagi yetakchi ta’lim muassasalari bilan hamkorlik aloqalarini o‘rnatish, shartnoma asosida kino sohasi bo‘yicha onlayn (on-line) o‘quv kurslarini o‘tkazishni yo‘lga qo‘yish rejalashtirilmoqda.
Hukumat tasdiqlagan rejaga muvofiq, “O‘zbekkino” hududlardagi davlat hokimiyati organlari bilan hamkorlikda O‘zbekistonning barcha shahar va tumanlarida mavjud kinoteatrlar faoliyatini tanqidiy o‘rganib chiqib, kinoteatrlarning samarali faoliyat ko‘rsatishini ta’minlash va har bir viloyatda davlat tasarrufidagi kamida bitta oliy toifali kinoteatr faoliyatini yo‘lga qo‘yish bo‘yicha chora-tadbirlar rejasini ishlab chiqadi.
Bundan tashqari, “O‘zbekiston ilmiy-ommabop va hujjatli filmlar kinostudiyasi” va “5-studiya” “O‘zbekfilm” bilan birlashtirib, uni sho‘’ba xo‘jalik jamiyatlariga ega bo‘lgan zamonaviy kino ishlab chiqarish kompleksi - kinokonsernga aylantirish bo‘yicha taklif tayyorlash ham ko‘zda tutilgan.
Izoh (0)