Вазирлар Маҳкамаси Ўзбекистонда миллий кинематография соҳасини ислоҳ қилиш ва янада ривожлантиришга қаратилган чора-тадбирлар режаси тасдиқлади. Бу ҳақда «Ўзбеккино» Миллий агентлиги матбуот хизмати хабар бермоқда.
Режага кўра «Ўзбеккино» Миллий агентлиги манфаатдор вазирлик ва идоралар билан биргаликда «Кинематография тўғрисида»ги қонуни лойиҳасини тайёрлаш бўйича Вазирлар Маҳкамасига таклиф киритиши керак.
Шунингдек, 2015 йил мобайнида «2016-2020 йилларда «Ўзбеккино» Миллий агентлиги ва унинг тизимидаги корхона-ташкилотлар фаолиятини янада такомиллаштириш, самарадорлигини ошириш ҳамда ишлаб чиқаришни модернизация қилиш, техник ва технологик қайта жиҳозлаш» Давлат дастури лойиҳасини ишлаб чиқиш режалаштирилган.
Соҳада фаолият кўрсатаётган ижодкорларни қўллаб-қувватлаш ва уларнинг касб маҳоратини ошириш мақсадида истеъдодли ёш киноижодкорларни ривожланган хорижий мамлакатлардаги таълим муассасалари, илғор киностудияларга ўқишга, малака ошириш ва тажриба алмашишга юбориш, хорижий мамлакатларнинг кинематография соҳасидаги етакчи таълим муассасалари билан ҳамкорлик алоқаларини ўрнатиш, шартнома асосида кино соҳаси бўйича онлайн (on-line) ўқув курсларини ўтказишни йўлга қўйиш режалаштирилмоқда.
Ҳукумат тасдиқлаган режага мувофиқ, «Ўзбеккино» ҳудудлардаги давлат ҳокимияти органлари билан ҳамкорликда Ўзбекистоннинг барча шаҳар ва туманларида мавжуд кинотеатрлар фаолиятини танқидий ўрганиб чиқиб, кинотеатрларнинг самарали фаолият кўрсатишини таъминлаш ва ҳар бир вилоятда давлат тасарруфидаги камида битта олий тоифали кинотеатр фаолиятини йўлга қўйиш бўйича чора-тадбирлар режасини ишлаб чиқади.
Бундан ташқари, «Ўзбекистон илмий-оммабоп ва ҳужжатли фильмлар киностудияси» ва «5-студия»ни «Ўзбекфильм» билан бирлаштириб, уни шўъба хўжалик жамиятларига эга бўлган замонавий кино ишлаб чиқариш комплекси - киноконцернга айлантириш бўйича таклиф тайёрлаш ҳам кўзда тутилган.
Изоҳ (0)