Braziliyaning Minas-Jerays shtati janubi-sharqida boshi tanasidan judo qilingan jurnalist jasadi topildi. Bu haqda “RIA Novosti” xabar bermoqda.
67 yoshli Evani Joze Metsker so‘nggi uch oydan beri Braziliyaning eng qashshoq hududlaridan biri – Jekitinonyeda giyohvand moddalar aylanmasi va bolalar fohishabozligi haqida axborot to‘plash ustida ishlayotgan edi.
“Braziliya jurnalistlar ittifoqi (BJI) izchil tergov-surishtiruv ishlari o‘tkazilishini talab qiladi. Mustaqil jurnalist Evani Joze Metsker ushbu tajovuzkor hududda narkotrafik va bolalar fohishabozligini tadqiq qilish bilan o‘z hayotini xavf ostida qoldirayotgani borasida bir necha bor ogohlantirilgan edi”, - deyiladi BJI bayonotida.
Metskerning jasadi u yo‘qolib qolganidan besh kun o‘tib topildi. Tanani yorib ko‘rish natijalariga ko‘ra o‘lim sabablarini aniqlash imkoni bo‘lmadi va hozirgi vaqtda jurnalistning jasadi keyingi tekshiruvlarni o‘tkazish uchun Belu-Orizonti shtati ma’muriy markaziga olib ketilgan.
Braziliya jurnalistlar ittifoqi Metskerga nisbatan amalga oshirilgan qotillikni qoraladi va ushbu hodisani “axborot erkinligi va axborot olish huquqiga qarshi jinoyat” deb atadi.
Izoh (0)