O‘shda O‘zbekiston—Qirg‘iziston biznes forumi bo‘lib o‘tdi

O‘sh shahrida O‘zbekiston—Qirg‘iziston biznes forumi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.

O‘zbekiston Yoshlari umumjahon assosatsiyasi va O‘zbekiston Respublikasining O‘sh shahridagi bosh konsulxonasi hamkorligida o‘tkazilgan forumda taʼlim, tibbiyot, oziq-ovqat, to‘qimachilik va turizm sohalari vakillari ishtirok etdi.

Forumning ochilish marosimida so‘z olgan O‘zbekiston Respublikasining O‘sh shahridagi bosh konsuli Zafarbek Ahmedovning Ahmedovning taʼkidlashicha, joriy yil may oyida qirg‘izistonlik tadbirkorlar Farg‘ona, Andijon va Namanganda bo‘lib, vodiy viloyatlarida tashkil etilgan biznes-forumlarda qatnashgandi. O‘sh shahridagi anjuman ushbu tadbirlarning mantiqiy davomi bo‘ldi.

“Bosh konsulxona bu kabi hamkorlikdagi tadbirlarga alohida eʼtibor qaratmoqda. Shu yilning 6 oyi davomida ikki davlat o‘rtasida savdo-iqtisodiy aloqalarni yanada mustahkamlashga qaratilgan 30 dan ortiq tadbirlarga bosh-qosh bo‘ldik”, deydi Zafarbek Ahmedov.

Forumda Study in Uzbekistan platformasini taqdim etgan Oliy taʼlimni rivojlantirish tadqiqotlari markazi bo‘lim boshlig‘i Saidjalol G‘oziyevning bildirishicha, bugungi kunda ushbu veb-portaldan O‘zbekistondagi 150 dan ortiq OTM haqidagi maʼlumotlar va roliklar o‘rin olgan. Xorijlik abituriyentlar portal yordamida mamlakatda tahsil olish uchun to‘g‘ridan-to‘g‘ri murojaat etishlari mumkin. Bu kabi ko‘rgazmalar esa platforma imkoniyatlari haqida taqdimot qilish uchun qulay maydon bo‘lib xizmat qiladi.

Biznes-forum davomida ikki davlat vakillari tomonidan o‘nlab hamkorlik shartnomalari imzolandi.