Ukraina hukumati 1993-yildan beri amal qilib kelayotgan Rossiya bilan harbiy-texnikaviy hamkorlik to‘g‘risidagi bitimni bekor qiladi. Bu haqda, Meduza.io’ning xabar berishicha, Ukraina bosh vaziri Arseniy Yatsenyuk ma’lum qilgan.
“Qachonlardir, 1993-yilning 26-mayida Ukraina va Rossiya o‘rtasida harbiy-texnikaviy sohalarda hamkorlik qilish to‘g‘risida bitim imzolangan edi. Ukraina Vazirlar Mahkamasi ushbu bitimning amal qilishini to‘xtatish haqida qaror qabul qiladi”, - deya ma’lum qildi Yatsenyuk.
Qayd etish joiz, 2014-yil mart oyi oxiridan boshlab Ukraina Rossiyaga harbiy ahamiyatga molik tovarlarni yetkazib berishni to‘xtatdi, shu yilning 16-iyunida esa Ukraina prezidenti Pyotr Poroshenko harbiy-sanoat majmuasi sohasida Rossiya bilan hamkorlik qilishni to‘liq ta’qiqlab qo‘ygan edi.
“TASS”ning yozishicha, SSSR tarqalib ketganidan so‘ng sovet raketa va aviatsiya sohalari korxonalari va konstruktorlik byurolarining uchdan bir qismi Ukraina hududida qolib ketgandi.
Izoh (0)