Украина ҳукумати 1993 йилдан бери амал қилиб келаётган Россия билан ҳарбий-техникавий ҳамкорлик тўғрисидаги битимни бекор қилади. Бу ҳақда, Meduza.io’нинг хабар беришича, Украина бош вазири Арсений Яценюк маълум қилган.
«Россия Федерацияси агрессор-мамлакатдир, у Қримни ноқонуний равишда ўзига қўшиб олди, Донецк ва Луганск вилоятилари ҳудудига ҳарбий йўл билан бостириб кирди. Россия Украина давлати ва унинг ҳудудий яхлитлигига таҳдид солмоқда», - деди Яценюк, мазкур битимни бекор қилиш заруратини изоҳларкан.
«Қачонлардир, 1993 йилнинг 26 майида Украина ва Россия ўртасида ҳарбий-техникавий соҳаларда ҳамкорлик қилиш тўғрисида битим имзоланган эди. Украина Вазирлар Маҳкамаси ушбу битимнинг амал қилишини тўхтатиш ҳақида қарор қабул қилади», - дея маълум қилди Яценюк.
Қайд этиш жоиз, 2014 йил март ойи охиридан бошлаб Украина Россияга ҳарбий аҳамиятга молик товарларни етказиб беришни тўхтатди, шу йилнинг 16 июнида эса Украина президенти Пётр Порошенко ҳарбий-саноат мажмуаси соҳасида Россия билан ҳамкорлик қилишни тўлиқ та’қиқлаб қўйган эди.
ТАССнинг ёзишича, CCСР тарқалиб кетганидан сўнг совет ракета ва авиация соҳалари корхоналари ва конструкторлик бюроларининг учдан бир қисми Украина ҳудудида қолиб кетганди.
Изоҳ (0)