Toshkentda haydovchilar sabrli bo‘lishga va yo‘lda bir-birini hurmat qilishga chaqirildi (video)

Toshkent shahri ko‘chalari bo‘ylab harakatlangan avtomobil barcha yo‘l harakati qoidalariga rioya qilib, piyodalarga va avtomobillarga yo‘l bergani aks etgan havaskor videorolik Facebook’dagi “Voditeli Tashkenta” guruhiga joylashtirildi.

Avtomobil videoregistratori orqali yozib olingan to‘rt daqiqalik videorolikda haydovchi ko‘chalarda barcha qoidalarga amal qilib, piyodalarga va avtomobillarga yo‘l bergani, o‘z navbatida ularning deyarli barchasi ushbu harakatlarga minnatdorchilik bildirgani ko‘rinib turgan. Rolik oxirida “Sabrli bo‘laylik, yo‘llarda bir-birimizni hurmat qilaylik” deya boshqa haydovchilar yo‘l harakati qoidalariga amal qilishga chaqirilgan.

Video ostiga izoh qoldirgan foydalanuvchilar muallifni maqtovlarga ko‘mib tashlagan. Bu boshqa haydovchilarga ham ijobiy ta’sir qilib, yaxshi namuna bo‘lishiga umid bildirilgan. Shu maqsadda rolikni imkoni boricha ko‘proq tarqatish lozimligi qayd etilgan.