“San-Martin de Bursako” futbol klubi o‘yinchisi Emanuel Orteganing vafoti munosabati bilan Argentina chempionatida bir haftalik tanaffus e’lon qilindi. RBC.ru’ning xabar berishicha, futbolchi “Primera S” divizioni doirasidagi “Yuventud Unida” jamoasiga qarshi 4-may kuni bo‘lib o‘tgan o‘yinda boshidan jarohat olgandi.
Ortega raqib jamoadagi Aleksis Valensuela bilan to‘qnashuvdan so‘ng muvozanatni yo‘qotib, maydon yonida joylashgan beton to‘siqqa boshi bilan borib urilgandi.
Futbolchi maydondan to‘g‘ri kasalxonaga olib borildi, shifokorlar futbolchining bosh suyagi ikki nuqtadan singani tashxisini qo‘yishdi. Ortega bir necha operatsiyalarni o‘tkazganiga qaramay, uning hayotini saqlab qolishning imkoni bo‘lmadi. Futbolchi payshanba kuni vafot etdi.
Argentina futbol federatsiyasi bayonotiga ko‘ra, 21 yoshli futbolchining vafoti haqidagi xabarni butun Argentina futbol jamoatchiligi chuqur qayg‘u bilan qabul qilgan va futbolchining xotirasi uchun mamlakat barcha futbol divizionlaridagi o‘yinlarni boshqa muddatga qoldirish haqida qaror qilingan.
Izoh (0)